Суперлигадаги ғалабали серияларга "Бунёдкор" чек қўйди

Ўзбекистон Суперлигасининг 7-тури доирасида барча беллашувлар ўз якунига етди, фақатгина Самарқанднинг «Динамо» клуби ҳамда Фарғонанинг «Нефтчи» жамоалари ўртасидаги учрашув қолдирилди. Ўтказилган баҳслар ичида энг катта эътибор қаратилган ўйинлардан бири Олмалиқнинг ОКМК клуби ҳамда пойтахтнинг «Бунёдкор» жамоаси ўртасида кечди.

Ушбу ўйинда "қалдирғочлар" майдонда меҳмон бўлишганига қарамай, рақибини 1:0 ҳисобида мағлубиятга учратди. Беллашувдаги ягона ва ҳал қилувчи голни эса Темурхўжа Абдухолиқов ўз ҳисобига ёздириб қўйди.

Қайд этиш жоиз, ушбу натижа билан ОКМК жорий чемпионатда илк мағлубиятини қабул қилиб олди. Миржалол Қосимов қўл остидаги жамоа шу пайтгача чемпионат доирасида кетма-кет 10 та ўйинда мағлубиятсиз серияни давом эттираётганди. ОКМК ўтган мавсум сўнгги бор "Нефтчи"дан мағлубият қабул қилганди. «Бунёдкор»га қарши баҳсдаги натижа эса нафақат Олмалиқ клубининг муваффақиятли сериясига нуқта қўйди, балки уларни пешқадамликдан ҳам маҳрум қилди.

Шундай қилиб, Суперлиганинг ушбу мавсумида мағлубият нималигини билмай келаётган фақат учта клуб қолди: Қаршининг «Насаф», пойтахтнинг «Бунёдкор» ва Самарқанднинг «Динамо» жамоалари.

Энди мухлислар мазкур клубларнинг келгуси ўйинларда ҳам ўз муваффақиятли серияларини давом эттиришларини интиқлик билан кутмоқда. Чемпионат давомида яна кўплаб қизиқарли ўйинлар олдинда эканлиги эса шубҳасиз. «Замин»ни Telegram’да ўқинг!