Лионель Месси жаҳон футболидаги энг иқтидорли 10 футболчи номини маълум қилди

Аргентина миллий терма жамоаси ҳамда “Интер Майами” клуби сардори, жаҳон футболи афсонаси Лионель Месси бугунги кунда энг юқори салоҳиятга эга бўлган ўн нафар ёш футболчи номини ошкор этди.

Саккиз марта «Олтин тўп» совринини қўлга киритган аргентиналик юлдузнинг эътирофига кўра, ҳозирги футболнинг келажагини белгилайдиган энг ёрқин истеъдодлардан бири “Барселона”нинг ёш юлдузи Ламин Ямалдир. Месси ушбу футболчининг иқтидорига алоҳида урғу бериб келмоқда.

Шу билан бирга, у жаҳон футболида ўз ўйини билан мухлисларни ҳайратга солаётган бир қатор бошқа иқтидор эгаларини ҳам санаб ўтди. Улар қаторидан “Ювентус”нинг ёш юлдузи Кенан Йилдиз, “Монако”дан Элисс Бен-Сегир, “РБ Лейпциг”нинг икки умидли футболчиси – Антонио Нуса ва Ассан Уэдраого, шунингдек, “Ноттингем Форест”нинг истеъдодли вакили Жоэл Ндала жой олди.

Месси, шунингдек, “Манчестер Сити”нинг ёш футболчиси Клаудио Эчеверри ва “Филадельфия Юнион” клубидан Каван Салливанни ҳам келажаги порлоқ иқтидорлар сифатида тилга олди.

Аргентиналик юлдуз наинки эркак футболчилар, балки хотин-қизлар футболидаги истеъдодларни ҳам унутгани йўқ. Унинг қайд этишича, қизлар орасида “Норт Каролина Кариж” клубидан Жедин Шоу ҳамда “Барселона” вакили Вики Лопеснинг иқтидори ва маҳорати диққатга сазовордир.

Мессининг фикрича, бу футболчилар замонавий футболнинг янги босқичга кўтарилишида муҳим роль ўйнайди ва келгусида дунё миқёсидаги юлдузларга айланади. Айниқса, Ламин Ямалнинг ҳар томонлама юқори маҳорати унинг эътиборини ўзига жалб қилган ва унинг келажакдаги катта ютуқларга эришишига ишончи юқорилигича қолмоқда. «Замин»ни Telegram’да ўқинг!