Индзаги бугун «Барселона»га қарши кечадиган ўйин олдидан нималар деди?

«Интер» бош мураббийи Симоне Индзаги Чемпионлар лигаси ярим финалида «Барселона»га қарши кечадиган муҳим учрашув олдидан ўз фикрларини билдириб ўтди.

— Жамоамиз ўтган ҳафтада ўз даражасидаги энг яхши ўйинини намойиш қила олмади, буни тан оламан. Бироқ охирги тўрт йил давомида бажарган ишимизга назар ташласак, натижаларимиз буюк даражада эканини кўриш мумкин. Бизга ҳатто айримлар А Серияда энг кучли тўртликка киришимизни ҳам имконсиз деган эди. Шунга қарамай, биз бунга эришдик. Шунинг учун ҳам шогирдларим ва севимли мухлисларимиз ҳақида ҳеч қачон салбий гапирмайман. Биз улар билан биргаликда катта мўъжиза яратдик, — деди мураббий.

— Биз рақибимиз «Барселона» ҳақида етарлича маълумотга эгамиз. Уларга раҳбарлик қилаётган Ханс-Дитер Флик кучли мутахассис, жамоани юқори даражада ташкил қилган. Улар таркибида кўплаб иқтидорли ҳужумкор футболчилар бор. Умуман, «Барселона» ажойиб ўйин кўрсатади, улар яхши шаклланган ва ўз тарбияланувчиларига ҳам эга. Ҳозиргача икки катта титулни қўлга киритишди ва яна иккитаси учун курашишмоқда.

Албатта, «Барселона»ни ҳурмат қиламиз, аммо бу рақибимиздан қўрқишимизни билдирмайди. «Барселона» билан бир қаторда «Бавария», «Реал Мадрид», «Манчестер Сити», «Арсенал» каби клублар ҳам ушбу турнирнинг энг кучли жамоалари ҳисобланади. Биз эса майдонда ўзимизнинг ҳақиқий кучимизни кўрсатишга тайёрмиз.

— Охирги ҳафтада «Барселона» кубокни ютган бўлса, «Интер» бир қатор муваффақиятсиз натижаларга дуч келди. Бу кайфият жиҳатидан фарқ яратиши мумкинми, деган саволга Симоне Индзаги шундай жавоб қайтарди:

— Ҳақиқатан ҳам, кайфиятда маълум даражада фарқ бўлиши мумкин. Бироқ ҳаммаси майдонда ҳал бўлади. Менинг фикримча, «Барселона» ҳозирги кунда Европанинг тўрт энг кучли жамоаси қаторидан ўрин олади. Бу қаторга мен яна «Арсенал» ҳамда ПСЖни ҳам киритган бўлардим.

Эслатиб ўтамиз, «Барселона» ҳамда «Интер» ўртасидаги Чемпионлар лигасининг ярим финал босқичидаги илк учрашуви 30 апрель куни Тошкент вақти билан соат 00:00да бошланади. Бу ўйин футбол мухлислари томонидан катта қизиқиш билан кутилмоқда. «Замин»ни Telegram’да ўқинг!