Кутманглар, бу футболчи сотилмайди...

Англия Премьер-лигасининг бу мавсумдаги энг яхши ҳужумчиларидан бири саналган Александер Исаак Европанинг бир қатор йирик клублари диққатини торта бошлади. Айниқса, Швеция терма жамоасининг 25 ёшли тўпурари жорий мавсумда «қарғалар» сафида 39 та ўйинда 26 та гол ва 6 та голли узатмани амалга оширганидан кейин унинг мухлислари янада кўпайди.

Маълум бўлишича, Англия чемпионлигини муддатидан аввал нишонлаган «Ливерпуль» ҳамда чемпионлик учун курашда иккинчи поғонани эгаллашга яқин турган «Арсенал» каби жамоалар ёзда Исаакни ўз сафларига жалб қилиш учун ҳаракат бошламоқчи.

Бироқ, «Ньюкасл» раҳбарияти ўзининг асосий ҳужумчисини сотиш ниятида эмас. Клубнинг асосий хўжайини саналмиш Ёсир Ар-Румайён мутасаддиларга бу масала бўйича ҳеч қандай таклифларни кўриб чиқмаслик ҳақида аниқ кўрсатма берган.

Клуб раҳбарияти швециялик футболчининг жамоа учун нақадар муҳим эканлигини жуда яхши тушунади ва тез орада унинг агентлари билан янги шартнома бўйича музокараларга киришишни режалаштирмоқда. Яқин орада Исаак ва клуб ўртасида янги, яхшиланган шартнома имзоланиши кутилмоқда.

“Ньюкасл” янги шартнома орқали ўйинчисини сақлаб қолиш билан бирга, Европанинг гранд клублари томонидан келадиган потенциал босимларни олдини олишга ҳаракат қилади. Бу эса ўз навбатида жамоанинг келажакдаги ютуқлари учун муҳим аҳамиятга эга бўлади. «Замин»ни Telegram’да ўқинг!