Ламин Ямаль: «Барселона» Миландаги ўйинга бор кучини ташлайди ва финалга чиқади»

УЕФА Чемпионлар лигаси ярим финалида "Барселона" ўз уйида Италиянинг «Интер» клубини қабул қилиб, кескин курашлар остида ўтган учрашувни 3:3 ҳисобидаги дуранг билан якунлади. Каталонияликларнинг ёш истеъдодли футболчиси Ламин Ямаль ўйиндан кейин ўз ҳис-туйғулари ва фикрлари билан ўртоқлашди.

17 ёшли испаниялик футболчи ушбу беллашув олдидан жамоа фақат ғалаба қозониш ҳақида ўйлаганини таъкидлади. Ламин Ямаль дуранг натижадан кўнгли қолганини яширмади, аммо жавоб ўйинида Миланда ғалаба қозониш учун жамоанинг барча эътиборини йўналтириш муҳимлигини айтиб ўтди.

«Бугун кўпроқ нарсани – фақат ғалаба қозонишни хоҳлардим. Энди эса Миланда ўтадиган учрашувда бор кучимизни сарфлашимиз керак. Ўйлайманки, биз жавоб баҳсида ўз кучимизни кўрсатиб, финалга йўл оламиз. Мени бироз кўнглим қолди, чунки мен ҳар доим ғалаба ҳақида ўйлайман ва бу мен учун энг муҳимидир. Аммо бугунги учрашув ортда қолди, диққатимни тўлиқ жавоб баҳсига қаратганман», – деди Ламин Ямаль.

Эслатиб ўтамиз, "Барселона" ва "Интер" ўртасидаги жавоб ўйини 7 май куни Миланда, Тошкент вақти билан соат 00:00 да бошланади. Каталонияликлар учун сафардаги ғалаба финалга чиқишнинг ягона йўли ҳисобланади.

Европанинг энг кучли клублари тўқнаш келган ушбу баҳсда ёш юлдузларнинг чиқиши мухлислар учун алоҳида қизиқиш уйғотмоқда. Ламин Ямальнинг Миланда ўз иқтидорини яна бир бор кўрсатиши ва "Барселона"га муҳим ғалабани олиб келиши мумкинлигига кўпчилик ишонмоқда.