Родри қайтиши, Де Брюйнега ҳурмат ва Гвардиоланинг тан олишлари

Қишки трансферлар ойнаси давомида “Манчестер Сити” сафига ўзбекистонлик ҳужумкор футболчи Абдуқодир Ҳусанов қўшилганидан сўнг, “шаҳарликлар”га бўлган қизиқиш юртимизда кескин ортиб кетди.

Ҳозирда кўплаб футбол ишқибозлари “Сити”га алоҳида эътибор қаратмоқда. Жамоа янгиликлари, трансферлар, таҳлиллар ва ҳар бир ўйини янада қизиқиш билан кузатилаётгани табиий ҳол.

Бу пайтда жамоа таркибида жиддий янгиланиш жараёнлари кетмоқда. Турли манбалар орқали “Сити”даги ўзгаришлар ҳақида турли маълумотлар тарқалмоқда.

Родри майдонга қачон қайтади?

2024 йилги “Олтин тўп” совриндори, жаҳон футболидаги энг юқори баҳоланадиган ярим ҳимоячилардан бири Родри мавсумнинг катта қисмини жароҳат сабабли ўтказиб юборганди. Фанатларни эса бир савол қийнамоқда: Родри қачон майдонга қайтади?

Бош мураббий Хосеп Гвардиола бу масалага ойдинлик киритди:

“Родри машғулотларни бошлаб юборган. Ҳозирда ўзини анча яхши ҳис қиляпти. Аммо шифокорлар тўлиқ рухсат бермас экан, уни майдонга туширмаймиз. Мени бу ҳақда шахсан хабардор қилишларини сўраганман. Биз таваккал қилмаймиз.”

Айтиш керакки, Родри жорий мавсум Англия Премьер-лигасида бор-йўғи икки учрашувда ҳаракат қилган. У тиззасидан жароҳат олган ва бир неча ой даволанишга мажбур бўлган.

Де Брюйне кетса ҳам — афсона сифатида

Яна бир катта мавзулардан бири — Кевин де Брюйненинг кетиши. Жамоадоши Жереми Доку бельгиялик плеймейкер ҳақида самимий сўзлар билан тўхталиб ўтди:

“Кевин — “Манчестер Сити”нинг афсонаси. У клуб учун катта муваффақиятларга эришди. Агар кетадиган бўлса ҳам, унга бўлган ҳурматимиз ўзгармайди. Мухлислар уни қадрлайди. Чунки у ҳақиқий етакчи.

У клубга ҳатто Гвардиоладан олдин келган. Олдинда Англия кубогининг финали бор. Биз Кевинни соврин билан кузатишни истаймиз.”

Маълумот учун, Де Брюйне “Сити” сафига 2015 йили келган ва унинг шартномаси 2024 йил 30 июнда ўз ниҳоясига етади.

Гвардиола тан олди: “Чарчаганман, танаффус оламан”

Хосеп Гвардиола жамоа бош мураббийлигини ташлаш ва фаолиятидан кейинги режалари ҳақида очиқ гапирди:

“Менимча, шартномам тугаши билан жамоани тарк этаман. Бу қарорга аниқ ишончим бор. Қолишимни Чемпионлар лигаси ҳам, катта маош ҳам ўзгартира олмайди.

Қайси жамоаларда ишлаган бўлсам, ўша ердаги мухлислар жамоа ўйинидан завқ олган, деб ўйлайман. Барселона, Бавария, Сити — ҳар бир босқичда яхши хотира қолдирдим, деб умид қиламан.”

Шу билан бирга, Гвардиола яқинда клуб билан шартномасини 2027 йил ёзигача узайтирган. Аммо, у тайин муддат келиши билан танаффус олишини таъкидламоқда.

“Манчестер Сити”даги бу янгиликлардан кўриниб турибдики, клубда нафақат тактик, балки шахсий жиҳатдан ҳам катта ўзгаришлар кутиляпти. Аммо энг асосийси — бу жамоада энди ўзбекистонлик юлдуз бор.

Сизнингча, Абдуқодир Ҳусанов “Сити”да ўз номини ёза оладими? «Замин»ни Telegram’да ўқинг!