Элит Осиё Чемпионлар Лигаси: Роберто Фирмино мусобақанинг энг яхши футболчиси деб топилди

Осиё футбол конфедерацияси (ОФК) Элит Осиё Чемпионлар Лигасининг якунланишидан сўнг мусобақада энг яхши ҳаракат қилган футболчилар номини эълон қилди.

Энг яхши дарвозабон сифатида Саудия Арабистонининг «Ал Аҳли» клуби посбони Эдуард Менди тан олинди. У мусобақа давомида ишончли ўйин намойиш этиб, ўз клубининг финалгача бўлган йўлида муҳим роль ўйнади.

Энг яхши тўпурар унвони «Ал Ҳилол» жамоасининг ҳужумкори Салим Ал Довсарининг ҳиссасига тушди. Саудиялик форвард Элит ОЧЛ мусобақасида энг кўп гол уриб, жамоасининг ярим финалгача етиб боришига катта ҳисса қўшди.

Мусобақанинг энг яхши ўйинчиси сифатида эса «Ал Аҳли» клубининг тажрибали ҳужумчиси Роберто Фирмино эътироф этилди. Бразилиялик футболчи финал баҳсида икки голга ассистентлик қилиб, жамоасининг бош совринни қўлга киритишида муҳим роль ўйнаган эди.

Эслатиб ўтамиз, «Ал Аҳли» клуби финалда Япониянинг «Кавасаки Фронтале» клубини 2:0 ҳисобида мағлуб этиб, Элит Осиё Чемпионлар Лигасининг бош совринига эга чиққанди.

Шундай қилиб, Роберто Фирминонинг ажойиб ўйини ҳамда Саудия Арабистони жамоаларининг мусобақадаги юқори натижалари Осиё футболидаги янгича давр бошланганини яна бир бор исботлади. «Замин»ни Telegram’да ўқинг!