«Реал Мадрид» таркибни кучайтириш учун йирик трансферлар режалаштирмоқда

Мадриднинг «Реал» клуби ёзги трансфер ойнасида таркибини жиддий равишда кучайтириш учун тайёргарлик кўрмоқда. «Relevo» нашрининг маълум қилишича, «қаймоқранглилар» келаси мавсум олдидан жамоага камида тўрт нафар янги футболчини қўшиб олиш ниятида.

Ушбу трансферларнинг биринчиси аллақачон амалга оширилди деса ҳам бўлади – бу «Ливерпуль» жамоасининг таниқли ҳимоячиси Трент Александер-Арнольд билан келишув эришилди. Қолган позициялар бўйича клуб марказий ва чап қанот ҳимоячилари, ярим ҳимоячи ҳамда ҳужумчи танлаш билан шуғулланмоқда. Айниқса, жамоа мудофаа чизиғини кучайтиришга алоҳида эътибор қаратган ва бу масалада янги бош мураббий бўлиши кутилаётган Хаби Алонсонинг таклиф ва тавсиялари муҳим роль ўйнайди.

Марказий ҳимоя позициясига энг кўп мос келадиган номзод сифатида «Арсенал» аъзоси Вильям Салиба кўриб чиқилмоқда. Шу билан бирга, жамоа «Кастилья» таркибида ҳаракат қилаётган иқтидорли футболчилар – Хоан Мартинес ва Хакобо Рамондан катта умид боғлаган.

Ярим ҳимоячи позицияси учун эса клуб ўз тарбияланувчиси бўлган Нико Пасни жамоага қайтариш режасини кўриб чиқмоқда. Ҳужумчи трансфери эса Родригонинг келажагига боғлиқ бўлади. Агар бразилиялик ҳужумчи жамоани тарк этса, унга ўхшаш, яъни Хоселуга хос бўлган ўйин услубига эга ҳужумчи топиш учун музокаралар бошланади.

Мадридликларнинг ушбу трансфер режалари янги мавсумда янада юқори натижалар қайд этиш ва титуллар учун жиддий курашиш мақсадида ишлаб чиқилган. «Замин»ни Telegram’да ўқинг!