Аббосбек Файзуллаев «ЦСКА» сафида ажойиб ўйин ўтказди — унинг ҳаракатлари қандай баҳоланди?

Россия Премьер-лигасининг 27-туридан ўрин олган "Ахмат" – ЦСКА жамоалари ўртасидаги қизғин баҳс 1:1 ҳисобида дуранг билан якунланди. Учрашув Грозний шаҳридаги «Ахмат Арена» стадионида бўлиб ўтди ва жамоалар мухлисларга кескин ва қизиқарли футбол намойиш этди.

Ушбу баҳсда Москва жамоасининг ўзбекистонлик ярим ҳимоячиси Аббосбек Файзуллаев ҳам иштирок этди ва асосий таркибдан жой олди. Ҳамюртимиз 90 дақиқа давомида майдонда бўлиб, ўзининг фаол ҳаракатлари билан мураббийлар ва экспертларнинг эътиборини тортди.

Аббосбек ўйин давомида бир неча бор жамоасининг хавфли вазиятларини яратишга ёрдам берди, ҳужумдаги шерикларига яхши паслар узатди. Шиддатли кечган беллашувнинг 57-дақиқасида ҳакам унга огоҳлантириш карточкасини кўрсатди, бироқ футболчимиз бундан сўнг ҳам майдондаги самарали ҳаракатларини давом эттирди.

Учрашувдан сўнг футболчиларнинг ҳаракатларига баҳо бериш билан шуғулланадиган машҳур Sofascore нашри Аббосбек Файзуллаевга юқори баҳо — 7,4 балл берди. Ушбу рейтинг жамоасида энг яхши кўрсаткичлардан бири бўлиб, ўзбекистонлик футболчининг ўйин даражаси юқорилигидан далолатдир.

Ҳозирги пайтда ЦСКА жамоаси Россия чемпионатида 52 очко билан турнир жадвалида 3-ўринни эгаллаб турибди. Аббосбек Файзуллаев эса ЦСКАнинг асосий таркибидаги ўрнини янада мустаҳкамламоқда ва жамоанинг кейинги ўйинларида ҳам муҳим рол ўйнаши кутилмоқда.

Ўзбекистонлик ярим ҳимоячи бу мавсумда Россия Премьер-лигасида 20 дан ортиқ ўйинда иштирок этди ва ўзининг ажойиб ҳаракатлари билан Москва клуби ишқибозлари қалбидан жой олишга эришди. «Замин»ни Telegram’да ўқинг!