Де Брюйне "Манчестер Сити"дан тезроқ кетмоқчи. У клублар ўртасидаги жаҳон чемпионатида қатнашмоқчи эмас

«Манчестер Сити»нинг белгиялик юлдузи Кевин де Брюйне клубдаги охирги мавсумини ўтказмоқда ва ёзги трансферлар вақтида янги жамоа билан шартнома тузишни режалаштирмоқда. У шу сабабли ФИФА томонидан янгиланган форматда ўтказиладиган клублар ўртасидаги жаҳон чемпионатида иштирок этишга қизиқиш билдирмаяпти.

Бу нуфузли турнир 15 июндан 13 июлга қадар АҚШ майдонларида бўлиб ўтади ва унда Европанинг энг кучли клублари қатнашади. Бироқ 33 ёшли тажрибали ярим ҳимоячи ёзги трансфер ойнасида ўз келажагини ҳал қилиш мақсадида мусобақага бормаслик ниятида эканини билдирди. Машҳур журналист Жереми Кросснинг хабар беришича, де Брюйне жаҳон чемпионати давомида эҳтимолий жароҳат олиб, янги клубга ўтиш имкониятини қийинлаштириб қўйишдан хавфсирамоқда.

Айни дамда Кевин де Брюйне билан «шаҳарликлар» ўртасидаги шартноманинг муддати якунланишига оз вақт қолган ва Англия Премьер-лигаси доирасида 25 май куни бўлиб ўтадиган «Фулхэм»га қарши учрашув унинг Манчестердаги сўнгги ўйини бўлиши мумкинлиги айтилмоқда. Бу эса, ўз навбатида, мухлисларнинг клубда кўп йиллардан бери ўйнаб келаётган юлдуз билан хайрлашув ўйинига айланиши эҳтимолини оширмоқда.

Бироқ де Брюйне журналистлар билан суҳбатда бу масалада ҳали клуб билан якуний қарорга келмаганини айтиб ўтди.

«Ҳозирча бу мавзуда аниқ бир гап айта олмайман, чунки клуб билан чемпионатда қатнашиш ёки қатнашмаслик борасида якуний муҳокамани ўтказмадик. Агар раҳбарият мени чақириб гаплашмоқчи бўлса, албатта, бунга тайёрман, лекин вазият айнан шу тарзда бўлишига кўзим етмаяпти», — деди белгиялик юлдуз футболчи.

Кевин де Брюйне «Манчестер Сити» сафидаги фаолияти давомида жамоанинг энг муҳим футболчиларидан бирига айланган ва унинг майдондаги ҳаракатлари кўплаб совринларга йўл очган. У «шаҳарликлар» билан бир неча бор Англия Премьер-лигасида, кубок мусобақаларида ғолиб чиққан ва Европанинг энг яхши футболчиларидан бири сифатида тан олинган.

Бу йилги мавсумда ҳам де Брюйне жамоанинг асосий ижрочиларидан бири бўлиб қолмоқда. Бироқ унинг клубни тарк этиш қарори жамоада янги ўзгаришларга сабаб бўлиши ва ёзги трансферларда Гвардиола учун жиддий муаммоларни келтириб чиқариши мумкин.

Клуб мухлислари эса ҳозирча юлдуз футболчининг бу қароридан хавотирда бўлиб, унинг «Фулхэм»га қарши ўйинда қандай ҳаракат қилишига ва бу жамоа тарихидаги сўнгги учрашув бўлиб қолмаслигига умид билдирмоқда.

Ҳар ҳолда, де Брюйненинг қарори футбол мухлислари ва мутахассислар учун яқин вақт ичида қизғин баҳс мавзусига айланиши аниқ. «Замин»ни Telegram’да ўқинг!