Бруну Фернандеш Саудия клубидан йирик таклиф олди: МЮ юлдузи жамоани тарк этадими?

“Манчестер Юнайтед” жамоасининг португалиялик сардори ва асосий етакчиларидан бири бўлган Бруну Фернандеш ўз фаолиятини Саудия Арабистонида давом эттириши эҳтимоли пайдо бўлди.

Маълумотларга кўра, Саудиянинг машҳур ва қудратли клубларидан бири бўлган “Ал Ҳилол” португалиялик ярим ҳимоячига жиддий қизиқиш билдирмоқда. Айни вақтда клуб ва футболчи ўртасида дастлабки музокаралар аллақачон ўтказилган.

Таъкидланишича, “Ал Ҳилол” раҳбарияти футболчининг трансфери учун катта маблағни, аниқроғи 80 миллион евро миқдорида тўлашга тайёр. Бу эса Брунунинг “Манчестер Юнайтед”даги шартномасида кўрсатилган трансфер нархидан ҳам анча юқори ҳисобланади.

Маълумот учун, Бруну Фернандешнинг “қизил иблислар” билан амалдаги шартномаси 2027 йилнинг ёзигача давом этади. Transfermarkt сайти футболчининг ҳозирги бозор қийматини тахминан 55 миллион еврога баҳолаган. Саудия клуби эса ушбу суммадан анча юқори таклиф бериб, футболчини жамоасига қўшиб олиш нияти жиддийлигини намойиш қилмоқда.

Жорий мавсум португалиялик футболчи Англия клубининг асосий фигураларидан бири сифатида ажойиб статистика қайд этди. У бу мавсумда барча турнирларда жами 52 та ўйинда майдонга тушди ва бу ўйинларда 19 марта рақиблар дарвозасини ишғол қилиб, яна 18 марта голли узатмалар билан ҳамжамоаларига ёрдам кўрсатди.

Ҳозирги ҳолатда “Манчестер Юнайтед” раҳбарияти ва бош мураббийи Рубен Аморим бу трансферга қандай муносабат билдириши номаълумлигича қолмоқда. Чунки Бруну Фернандеш жамоа таркибида муҳим ўрин эгаллайди ва клуб ундан осонлик билан воз кечиши иккилантириши мумкин.

Бироқ Саудиядаги “Ал Ҳилол” клуби ўз сафини топ-футболчилар билан мустаҳкамлашни мақсад қилиб қўйган ва бундай йирик трансферларни амалга оширишда кўплаб муваффақиятларга эришган. Клуб раҳбарияти Фернандешга жуда юқори маош таклиф қилиши ҳам эҳтимолдан холи эмас.

Ҳозирда бу музокаралар қай даражада давом этиши ва футболчининг якуний қарори қандай бўлиши мухлислар ҳамда футбол жамоатчилиги томонидан катта қизиқиш билан кузатилмоқда.

Бу трансфер яқин орада амалга ошса, у футбол оламидаги энг йирик ва муҳим келишувлардан бири бўлиши мумкинлиги айтилмоқда. «Замин»ни Telegram’да ўқинг!