Европа грандлари "янги Месси" учун курашмоқда: Гвардиола ҳам истеъдодли футболчига кўз тикди

Ҳозирда Аргентина футболида ёрқин юлдузлар чиқиши янги ҳодиса эмас. Бироқ, 17 ёшли Франко Мастантуоно сўнгги пайтларда жаҳон футболида шов-шувга сабаб бўлган энг ёрқин ва истиқболли футболчилардан бири сифатида тилга олинаётир.

Франко Мастантуоно "Ривер Плейт" клуби тарбияланувчиси бўлиб, ҳужумкор ярим ҳимоячи сифатида фаолият кўрсатади. У ўзининг техникаси, юқори тезлиги ва ажойиб футбол ақли билан нафақат маҳаллий чемпионат, балки халқаро мутахассисларнинг ҳам диққатини тортмоқда. Айниқса, унинг ўйин услуби Аргентина футболи афсонаси Лионель Мессига таққосланмоқда, шу боис ёш иқтидор эгасини матбуот аллақачон "янги Месси" деб атаб улгурган.

Мастантуоно илк бор 16 ёшида профессионал даражадаги ўйинда гол киритиб, "Ривер Плейт" жамоаси тарихидаги энг ёш гол муаллифига айланган. Бу воқеа уни нафақат Аргентинада, балки бутун Лотин Америкасида ҳам машҳур қилди. У мунтазам равишда Аргентина ёшлар терма жамоасига жалб қилиниб, ўзининг етуклиги, ақлли ўйини ва мукаммал ҳаракатлари билан терма жамоанинг етакчиларидан бирига айланиб улгурди.

Дастлаб аргентиналик вундеркиндга Италиянинг етакчи клублари – "Милан" ва "Интер" қизиқиш билдирганди. Кўп ўтмай бу икки грандга "Барселона" ҳам қўшилди ва каталонияликлар футболчи билан жиддий шуғулланишни бошлади. Бироқ, ҳозир вазият янада кескин тус олди, чунки курашга Пеп Гвардиола бошчилигидаги "Манчестер Сити" ҳам қўшилган.

Гвардиола ва "Сити" раҳбарияти Мастантуонони клубнинг келажакдаги асосий лойиҳаси сифатида кўришмоқда. Хусусан, "Сити" аргентиналик футболчини ўз вақтида клубга олиб келган ҳамюрти Хулиан Альварес билан солиштириб, унинг клубда шу тарзда ривожланишига ишонч билдирмоқда. "El Nacional" нашри тарқатган маълумотга кўра, "Манчестер Сити" истеъдодли футболчига фойдали шартнома ҳамда дунёнинг энг яхши мураббийларидан бири бошчилигида ривожланиши учун қулай шароитларни тақдим этишга тайёрлигини билдирган.

"Барселона" учун вазият эса анча мураккаб. Каталония клубининг молиявий чекловлари туфайли трансфер харажатларини амалга ошириши жуда қийин кечади. "Ривер Плейт" ўз тарбияланувчисини 40 миллион евро атрофида баҳоламоқда. Бу рақам айни пайтда каталонияликлар учун жиддий муаммо бўлиб қолмоқда. Агар клуб яқин вақт ичида ўзининг бир ёки бир неча етакчи футболчисини сотмаса ёки қўшимча молиявий манбалар жалб этмаса, Мастантуоно трансферини амалга ошириш қийин бўлиб қолиши мумкин.

Бу борада эса рақобат тобора ошиб бормоқда. "Манчестер Сити" билан бир қаторда Парижнинг ПСЖ клуби ҳам аргентиналик вундеркиндни ўз сафига қўшиб олишни мақсад қилган. Бу эса "Барселона" учун жиддий рақобат муҳитини яратмоқда ва каталонияликларнинг футболчидан маҳрум бўлиб қолиш эҳтимолини кучайтирмоқда.

Қайси жамоага ўтишига қарамасдан, бир нарса аниқки, Франко Мастантуоно яқин келажакда дунёнинг энг машҳур клубларидан бирида ўз маҳоратларини намойиш этадиган футболчига айланади. Унинг қайси клубни танлаши эса ёзги трансферлар ойнасида аниқ бўладиган энг қизиқарли масалалардан бирига айланган. «Замин»ни Telegram’да ўқинг!