Гвардиола фаолиятидаги энг оғир рақибни айтди: «У мени тинч ухлашимга имкон бермасди»

«Манчестер Сити» клубининг испаниялик бош мураббийи Хосеп Гвардиола ўз мураббийлик фаолияти давомида дуч келган энг мураккаб рақиб ҳақида гапириб ўтди. Унинг фикрича, германиялик мутахассис Юрген Клопп ва унинг «Ливерпуль» клуби билан рақобатлашиш ҳар қандай бошқа жамоага қарши ўйнашдан анча қийин бўлган.

Гвардиолага кўра, Клоппнинг услуби, тактикаси ва ўйинга ёндашуви ҳар доим катта муаммо туғдирган ва унга қарши тактик режалар тузиш учун анча вақт сарфлаган.

«Мураббийлик фаолиятим давомида кўплаб буюк рақибларга қарши ўйнадим, лекин мен учун энг катта синов – Юрген Клоппнинг "Ливерпуль"ига қарши туриш эди. Юргеннинг тактикаси мени доимий равишда бош оғриғига дучор қилган ва менинг тинч ухлашимга йўл қўймасди. Ҳатто, баъзан тунлари ҳам мураббийлар хонасида унга қарши қандай ўйнаш ҳақида бош қотириб ўтирардим. Мураббийлик фаолиятим давомида ундан кучлироқ рақибга ҳеч қачон дуч келмаганман», – деди испаниялик мутахассис.

Маълумот учун, Гвардиола ва Клопп Англия Премьер-лигасида деярли бир вақтда пайдо бўлишган. Испаниялик мутахассис 2016 йилдан бери Манчестер клубини бошқариб келмоқда. Юрген Клопп эса 2015 йилдан 2024 йилгача «Ливерпуль» бош мураббийи сифатида ишлади. Бу давр мобайнида икки мутахассиснинг жамоалари ўзаро жуда кўп қизиқарли ва кескин ўйинларни намойиш этиб, мухлислар томонидан катта эътирофларга сазовор бўлган эди.

Клоппнинг «Ливерпуль» билан Англия чемпионлигини қўлга киритиши ва Чемпионлар лигаси ғолибига айланиши Гвардиола бошчилигидаги «Сити» учун доимий босим ўтказиб турган. Айниқса, 2018-2019 йилги мавсумда «Ливерпуль» ҳам, «Манчестер Сити» ҳам юқори даражадаги футбол кўрсатиб, чемпионлик тақдирини охирги турда ҳал қилганди. Натижада Гвардиола ва унинг жамоаси минимал фарқ билан ғалаба қозонган бўлса-да, ўша мавсум Премьер-лига тарихидаги энг кескин чемпионлик кураши сифатида эсда қолган.

Айни пайтда Юрген Клопп мураббийлик фаолиятини тўхтатиб, Red Bull компаниясида юқори лавозимда иш олиб бормоқда. Аммо Гвардиола унинг футболга қайтишига ишонч билдириб, «унинг мураббийликка қайтишини интизорлик билан кутаяпман», дея қўшимча қилди.

Гвардиола бу баёноти билан яна бир марта Юрген Клоппнинг замонавий футбол тарихидаги ўрни қанчалик муҳим эканини таъкидлаб ўтди. Бу икки мураббий ўртасидаги рақобат футбол мухлислари учун узоқ йиллар давомида ажойиб хотира сифатида қолади. «Замин»ни Telegram’да ўқинг!