ПСЖ "Арсенал"ни финал йўлидан олиб ташлади, Дембеле эса рекорд ўрнатди!

Европа Чемпионлар лигаси ярим финал босқичининг жавоб учрашувида «Пари Сен-Жермен» ўз майдонида Лондоннинг «Арсенал» клубини қабул қилди ва юқори савиядаги футбол намойиш этиб, финалга йўл олди.

Биринчи учрашувда «ПСЖ» Лондонда кичик ҳисобдаги муҳим ғалабани қўлга киритган эди. Париждаги жавоб баҳсида ҳам парижликлар ўз мухлислари олдида аниқ ҳаракатлари билан рақибдан яхшироқ ўйин кўрсатди.

Ўйиннинг илк дақиқалариданоқ ПСЖ футболчилари фаол ҳужумлар билан рақиб дарвозаси олдида кўплаб хавфли вазиятларни яратди. 23-дақиқада Фабиан Руис ажойиб тарзда тўпни рақиб дарвозасига жойлаб, ҳисобни очди. Бу голдан кейин ҳам мезбонлар тўхтамади ва ўз устунлигини янада кучайтириш учун интилишда давом этди.

Иккинчи бўлимнинг 72-дақиқасида Ашраф Ҳакими Усмон Дембеленинг аниқ пасидан сўнг ҳисобни 2:0 кўринишига келтирди. «Арсенал» ҳисобни тенглаштириш учун катта куч сарфлади. Лондонликлар ҳужумлари 76-дақиқада натижа берди. Букайо Сака жамоасининг ягона жавоб голини киритди ва учрашувдаги интригани қайта тиклади. Бироқ, ПСЖ 2:1 ҳисобини ўйин охиригача сақлаб қолди.

Усмон Дембеле бу ассистенти орқали янги рекорд ўрнатди. Франциялик ҳужумкор футболчи Чемпионлар лигаси бир мавсумида энг кўп самарали ҳаракатларни амалга оширган француз футболчиси сифатида ўз номини тарихга муҳрлади. Squawka статистика марказининг маълумотига кўра, 27 ёшли юлдуз бу мавсум мусобақанинг 14 учрашувида 8 та гол ва 4 та голли узатма билан жами 12 балл тўплашга эришди.

Ушбу тарихий натижа билан ПСЖ Европа Чемпионлар лигаси финалига йўлланма олди. Финал учрашуви 31 май куни Германиянинг Мюнхен шаҳрида жойлашган «Арена Мюнхен» стадионида бўлиб ўтади ва парижликларнинг рақиби Миланнинг «Интер» клуби бўлади.

Усмон Дембелега ўз рекордини янада яхшилаш ва жамоасини кутилган совринга етаклаш учун яна бир имконият пайдо бўлди. Мухлислар финалда ушбу футболчидан янада ажойиб ҳаракатларни кутиб қолишган. «Замин»ни Telegram’да ўқинг!