“Манчестер Сити” Доннарумма учун курашга қўшилди: Эдерсон клубни тарк этиши мумкин

“Манчестер Сити” жамоаси анча вақтдан бери юқори даражадаги дарвозабон қидириш билан шуғулланмоқда. Бунга клубнинг асосий посбони Эдерсон ўтган йилдан бери жамоани тарк этиш истагида экани сабаб бўлмоқда.

Football Italia нашрининг маълумотига кўра, Италия миллий терма жамоасининг асосий дарвозабони Жанлуижи Доннарумма ПСЖ клубини тарк этиш эҳтимоли кун сайин ошиб бормоқда.

26 ёшли дарвозабоннинг Париж клуби билан амалдаги шартномаси яна бир йил давом этади. Бироқ, у янги шартномага имзо чекишга шошилмаяпти ва келажагини бошқа чемпионатларда синаб кўриш имкониятини кўриб чиқмоқда.

Манбанинг маълум қилишича, Италиянинг икки катта клуби – “Ювентус” ҳамда “Интер” Доннаруммани ўз юртига қайтариш ва А Серияда фаолиятини давом эттиришга кўндиришни мақсад қилган.

Шунингдек, энди бу трансфер учун курашга молиявий жиҳатдан кучли имкониятга эга бўлган Англия Премьер-лигаси клуби “Манчестер Сити” ҳам қўшилган. Англияликлар Доннаруммани Италияга қайтиш фикридан қайтариб, Премьер-лигага жалб қилишлари мумкинлиги тахмин қилинмоқда.

Бундан ташқари, яқинда Бундеслига чемпионлигини “Байер”дан қайтариб олган “Бавария” ҳам Доннаруммани жиддий кузатмоқда ва уни ўз сафига қўшиб олиш имкониятини баҳоламоқда.

Шундай қилиб, бу ёзги трансфер ойнасида Доннарумманинг келажаги билан боғлиқ қизиқарли кураш юзага келиши мумкин. Бу эса футбол мухлислари учун яна бир қизиқ мавзу бўлади. «Замин»ни Telegram’да ўқинг!