“Манчестер Юнайтед” мураббийи жамоадаги энг хавфли муаммони очиқ қилди

Англия Премьер-лигасининг 36-туридан ўрин олган навбатдаги ўйинда “Манчестер Юнайтед” ўз майдонида “Вест Хэм”га қарши куч синашди ва мағлубиятга учраб, турнир жадвалида 16-поғонага тушиб кетди. Ушбу натижа жамоа тарихида сўнгги йиллардаги энг оғир мавсумлардан бири бўлаётганини яна бир бор исботлади.

Ўйиндан кейинги матбуот анжуманида клубнинг бош мураббийи Рубен Аморим жамоадаги руҳий тушкунлик ва ички интизом етишмаслиги ҳақида очиқ ва кескин фикрлар билдирди.

“Муаммо — ҳеч ким хавотирланмаяпти”

“Энг хавотирли жиҳат — жамоада барчаси жойидадек туюлаяпти. Гўёки натижалар аҳамиятсиз, ўйинда мағлуб бўлиш одатий ҳолга айланган. Бу — энг катта муаммо. Биз энди ўзимизни катта клуб сифатида ҳис қилмаяпмиз,” — деди мураббий.

“Ғалабага эҳтиёж ҳис қилинмаяпти”

“Европа Лигаси финали ҳақида ҳамма ўйлаяпти, лекин бу ҳозирги кунда энг асосий муаммо эмас. Бизда ҳал қилиниши шарт бўлган жиддий масалалар бор. Жамоа Премьер-лига ўйинларига тайёр эмасдек. Баъзида ғалаба шарт эмасдек туюлаяпти. Шунга кўра, руҳий тушкунлик авжига чиққан.”

“Бу фақат футболчилар ҳақида эмас — бу маданият масаласи”

Мураббий ўз нутқида футболчиларга алоҳида “айб” юклашни истамади, аксинча клубнинг умумий руҳи ва маданияти ҳақида тўхталди:

“Мен футболчиларни айбламайман. Мен ўзим ҳақимда гапиряпман. Бу клуб маданияти масаласи. Агар бу сезги сақланиб қолса, у ҳолда биз бошқаларга ўрин бериб, ўзгаришга йўл очишимиз керак.”

“Ёзда жиддий ўзгаришлар бўлади”

“Ёзда катта ўзгаришлар қилишимиз шарт. Бу таркибдаги футболчилар ҳақида эмас, балки жамоа ва клубнинг ички руҳи ҳақида. Кейинги мавсум шундай бошланмаслиги керак. Биз яна кучли, жасур ва ғалаба учун курашадиган жамоага айланишимиз керак.”

Финал муҳимми?

“Ростини айтсам, финал мени қийнамаяпти. Бу — клубдаги энг муҳим муаммо эмас. Биз анча улкан масалаларни ҳал қилишимиз керак. Бунинг учун жавобгарлик тўлиқ менинг зиммамда.”

Эслатиб ўтамиз, “Манчестер Юнайтед” жамоаси 21 майдан 22 майга ўтар кечаси Европа Лигасининг финалида “Тоттенхэм”га қарши майдонга тушади. Аммо жамоа бош мураббийига кўра, бу беллашув — жамоа ичидаги чуқур муаммоларга шифо бўлолмайди.

Zamin.uz таҳририяти клубнинг ички муҳитини соғломлаштириш, руҳий тайёргарликни кучайтириш ва ҳақиқий “Юнайтед” руҳини тиклаш йўлида жамоага сабр, куч ва муваффақият тилайди. «Замин»ни Telegram’да ўқинг!