Элдор Шомуродовнинг “Аталанта”га қарши ўйини қандай баҳоланди?

Италия чемпионатининг 36-турида “Рома” футболчилари Бергамода “Аталанта” меҳмони бўлиб, кескин курашлар остида кечган учрашувда 1:2 ҳисобида мағлубиятга учради.

Шу тариқа, Клаудио Раньери шогирдларининг А Сериядаги 19 та учрашувдан иборат мағлубиятсиз серияси барҳам топди.

Элдор Шомуродов илк дақиқалардан майдонга тушди. Анча фаол ўйнади. Биринчи бўлимда ҳисоб 1:1 бўлиб турган паллада, ҳимоячини алдаб ўтиб, Мануэль Конени гол уриш учун идеал вазиятга чиқарди. Аммо Коне тўпни ўзидан қочириб юборди ва имконият бой берилди.

“Рома” бу мағлубиятдан кейин амалда Европа Чемпионлар лигаси йўлланмасини қўлдан чиқарди. "Аталанта" эса, чемпионат якунланишига икки тур қолганида учинчи ўринни нақд қилди.

Италия футболини ёритаётган romaforever.it сайти “Рома” футболчиларининг ўйинини қуйидагича баҳолади.

СВИЛАР 6:
Сербиялик дарвозабон жамоасини қутқариш учун қўлидан келганини қилди. Бироқ Лукман ва Сулемана йўллаган зарбаларни қайтаришнинг имкони йўқ эди.

ЧЕЛИК 6:
Рақибнинг энг хавфли футболчиси Лукманга қарши ўйнаганига қарамай, Челик учрашув давомида қўпол хатога йўл қўйгани йўқ.

МАНЧИНИ 6,5:
Учрашув бошида мушакларини шикастлаб олган бўлса-да, Жанлука оғриқларни енгиб ўтиб, жамоасига катта ёрдам бера олди. Фаол ва бехато ўйнади. Лекин бу дарвоза дахлсизлигини сақлаб қолишга камлик қилди.

НДИКА 6:
Тажрибали ҳимоячи учрашув бошида рақиб плеймейкери Де Кателерени тўхтатишга анча қийналди. Бироқ вақт ўтиши билан бу вазифани жуда яхши уддалади.

РЕНШ 5,5:
Раньери нидерландиялик футболчига асосий таркибга лойиқ эканини кўрсатиш имконини берди. Ренш бундан фойдалани олмади. Лукман биринчи голни урган вазиятда айнан мана шу ҳимоячи қўпол хатога йўл қўйди.

КРИСТАНТЕ 7:
Универсал футболчига айланиб қолган Брайан Кристанте собиқ жамоаси дарвозасини боши билан ишғол қилди. Гол мағлубиятдан қутилиб қолишга камлик қилди.

КОНЕ 6,5:
Жуда фаол ўйнади. Жисмоний ҳолати юқори даражада эканини намойиш қилди. Рақиб жарима майдончасида йиқитилди. Лекин VAR ҳакамлари белгиланган пенальтини бекор қилди.

АНЖЕЛИНО 6:
Ўз даражасида ўйнади. Айрим ҳолатларда шошма-шошарлик туфайли вазиятлардан унумли фойдалана олмади.

ШОМУРОДОВ 6:
Ҳужумчилар учун зарур бўлган иштиёқни намойиш қилди. Бу ўйинчи машаққатли меҳнатлари билан ўзига асосий таркибдан жой очди. Элдор борини бериб ўйнаш, кучли рақобатни енгиб ўтиш, ишга бўлган иштиёқ ва тинимсиз ҳаракат машҳур номлардан фойдалироқ эканини кўрсатди. “Аталанта” билан баҳсда ҳам жамоадошига гол уришга жуда қулай вазият яратиб берди. Коне Шомуродов яратган вазиятни бой бериб, жамоасини ҳисобда олдинга олиб чиқиш имконидан фойдалана олмади.

ДОВБИК 5:
Бу гал украиналик ҳужумчи сояда қолиб кетди. Жамоасига фойда келтира олгани йўқ. Ўтган йили Ла Лиганинг энг зўр тўпурари бўлган Довбикдан жуда катта натижалар кутилган эди. Бироқ унга қатъият етишмади.

СУЛЕ 6,5:
Ёш аргентиналик ҳужумкор футболчи ўзининг машҳур ҳамюрти Пауло Дибалага ўхшаб ўйнаяпти. Айнан унинг идеал узатмасидан кейин Кристанте собиқ жамоасига гол урди. Лекин қолган паллада Суле бошқа голли вазият ярата олмади.

Янгиликлар