"Реал" янги давр остонасида: Хаби Алонсо "Байер"дан икки юлдузни олиб келмоқчи!

Бу мавсум якунланиши билан “Байер” клубини тарк этиб, Мадриднинг "Реал" жамоаси бошқарувини қабул қилиши деярли ҳал бўлган испаниялик ёш мутахассис Хаби Алонсо трансфер бозорида жиддий ҳаракатларга киришмоқда. "Real Madrid Confidential" нашрининг ишончли манбасига кўра, келгуси мавсум учун таркибни кучайтиришни режалаштирган Алонсо, жамоа раҳбариятига трансферлар борасида ўз талаб ва истакларини етказган.

Хаби Алонсо мадридликлар сафида кўришни хоҳлаган асосий футболчилар қаторида икки нафар ҳимоячи бор ва ҳар иккиси ҳам ҳозирда “Байер” шарафини ҳимоя қилади. Улар — тажрибали чап қанот ҳимоячиси Алекс Гримальдо ҳамда марказий ҳимоянинг ишончли таянчи Жонатан Та. Хаби бу футболчиларни ўз услуби ва футбол фалсафасига мос келиши туфайли Мадрид жамоасига олиб келмоқчи.

Маълум қилинишича, “Байер” клуби раҳбарияти Алекс Гримальдо учун тахминан 30 миллион евро атрофида бадал пули талаб қилмоқда. Унинг ҳозирги шартномаси 2025 йилнинг ёзида ўз якунига етади. Унга "Реал" билан бир қаторда Каталониянинг “Барселона” клуби ҳам қизиқиш билдирмоқда ва бу трансфер учун катта рақобат вужудга келиши кутилмоқда.

Жонатан Танинг ҳам клуб билан шартномаси 2025 йилгача мўлжалланган бўлиб, у шартнома муддати тугаганидан кейин эркин агент сифатида клубни тарк этиши мумкин. Аммо "Реал" уни ёзги трансферлар ойнасидаёқ тезроқ ўз сафларига қўшиб олиш учун ҳаракат қилади. 27 ёшли Та марказий ҳимоя чизиғида ўзининг қатъияти, кучли жисмоний ҳолати ва ишончли ўйини билан танилган.

Шу билан бирга, Мадриднинг "қироллик клуби" "Арсенал"нинг ёш ва истеъдодли ҳимоячилари Уильям Салиба ҳамда Льюис Скеллини ҳам эҳтимолий трансфер рўйхатига киритган. Бироқ Хаби Алонсо улардан кўра ўзининг олмон клубидаги шогирдлари Гримальдо ҳамда Тани устувор танлов сифатида кўрмоқда.

Zamin.uz таҳририятининг фикрича, Хаби Алонсонинг Мадриддаги фаолияти қизиқарли ва янги ўзгаришларга бой бўлиши кутилади. Испаниялик мутахассис келаси мавсум учун кучли ва ишончли жамоа шакллантиришига ишонамиз. Бу трансферларнинг амалга ошиши "Реал"нинг янги даври учун муҳим аҳамият касб этиши мумкин. «Замин»ни Telegram’да ўқинг!