Оғир атлетика бўйича Осиё чемпионати: Ўзбекистонлик қизларимиз Хитойда медалларга эга чиқди

Хитойнинг Жиангшан шаҳрида давом этаётган оғир атлетика бўйича Осиё чемпионатида Ўзбекистон миллий терма жамоаси аъзолари ўзларининг юқори салоҳиятларини яна бир бор кўрсатиб, мамлакатимизга навбатдаги медалларни тақдим этишди. Бу сафар совриндорлар орасида икки нафар истеъдодли ҳамюртимиз — Ригина Адашбаева ва Мадина Файзуллаева ҳам бор.

Жумладан, -81 кг вазн тоифасида иштирок этган Ригина Адашбаева даст кўтариш бўйича мусобақаларда 104 килограммлик натижа қайд этди ва шу натижа билан бронза медалига эга чиқди. Шунингдек, у иккикураш натижасида умумий 224 килограмм кўрсаткичи билан яна бир бор бронза медалини қўлга киритиб, икки карра совриндор бўлди.

Терма жамоамизнинг яна бир иқтидорли спортчиси Мадина Файзуллаева ҳам ўзининг кучли эканлигини кўрсатиб, силтаб кўтариш машқида 121 килограммлик оғирликни муваффақиятли равишда бўйсундирди. Шунинг натижасида Мадина ўз вазн тоифасидаги кучли учликка кириб, бронза медалига сазовор бўлди.

Ўзбекистон оғир атлетика федерациясининг маълум қилишича, бундай нуфузли мусобақаларда ёш спортчиларимизнинг муваффақиятли иштирок этиши мамлакатда ушбу спорт тури учун қўйилган эътибор ва шароитларнинг юқори эканлигидан далолат беради. Бу каби натижалар, ўз навбатида, келгуси нуфузли халқаро мусобақалар, хусусан, Жаҳон чемпионати ва Олимпия ўйинларида ҳам юқори ўринларни қўлга киритиш учун умид уйғотади.

Хитойда давом этаётган чемпионатда Ўзбекистон терма жамоаси аъзоларидан янада кўпроқ медаллар кутилаётгани таъкидланмоқда. Федерация мутасаддилари мусобақанинг қолган кунларида бошқа спортчиларимиз ҳам ғолиб ва совриндорлар қаторидан ўрин эгаллашига ишонч билдирмоқда. «Замин»ни Telegram’да ўқинг!