«Андижон» клуби мураббийлар штабига яна бир тажрибали хорижий мутахассисни жалб қилди

«Андижон» футбол клубида мураббийлар штабидаги янгиланишлар давом этмоқда. Яқинда жамоа раҳбарияти клубнинг янги бош мураббийи сифатида Максим Шацких тайинланганини эълон қилган эди. Энди эса унинг ёрдамчиси сифатида украиналик тажрибали мураббий Виталий Васильевич Шпанюкнинг иш бошлаши расман маълум қилинди.

1971 йилнинг 12 февралида Украинада туғилган 54 ёшли мутахассис ўз фаолиятида мураббийлик Про лицензиясига эга бўлиб, кўплаб жамоаларда самарали меҳнат қилган. Шпанюк Украина ва хорижий клубларда бой тажриба орттирган. Хусусан, у «Кремен», «Арсенал» (Киев), Украина миллий терма жамоаси, «Славутич», «Карпати», «Лвов» ва «Ворскла» каби украин клубларида, Россиянинг «Анжи» ва «Ротор» клубларида, шунингдек, Грузиянинг машҳур «Динамо» Тбилиси жамоасида ўзини кўрсатган.

Ўзбекистон футболи мухлисларига Шпанюк «Пахтакор» клубида Максим Шацких билан биргаликдаги фаолияти орқали яхши таниш. Айнан Тошкент клубида улар биргаликда ишлаб, самарали натижаларга эришган эдилар. Шу сабабдан Шацких яна бир бор Шпанюк билан ҳамкорлик қилишга қарор қилган ва уни ўзининг ишончли ёрдамчиси сифатида «Андижон»га таклиф этган.

Клуб раҳбариятининг фикрича, Максим Шацких ва Виталий Шпанюк дуэти жамоани янги мавсумда юқори натижаларга олиб чиқиш учун муҳим рол ўйнаши мумкин. Шунингдек, бу тажрибали мураббийларнинг келиши билан «Андижон» клубидаги профессионаллик даражаси ҳамда тактик савия янада ошиши кутилмоқда.

Экспертлар ва мухлислар эса «Андижон» клубининг янги мураббийлар штаби мамлакат чемпионатида рақобатбардош ва самарали жамоани шакллантиришига умид билдирмоқда. «Замин»ни Telegram’да ўқинг!