Игорь Сергеев: "Насаф"га қойил қолиш керак, улар чиройли футбол намойиш этишди"

Ўзбекистон кубоги "B" гуруҳи 3-туридан ўрин олган "Пахтакор" – "Насаф" (6:3) учрашувидан сўнг мезбонлар ҳужумчиси Игорь Сергеев ўз фикрлари билан ўртоқлашди.

- "Насаф"га қарши ўйин қандай таассурот қолдирди?
- Яхши ўйин бўлди. Очиқ ўйин. Гувоҳи бўлганингиздек, голлар у ёқдан-бу ёққа кетаверди. Менимча, "Насаф" 3:6 ҳисобида ютқазган бўлса-да, Ўзбекистондаги энг кучли жамоалардан бири ҳисобланади. Улар жуда чиройли футбол намойиш этишди. Ростдан ҳам, қойил қолиш керак. Чин дилдан хурсандман. Улар учун эмас, шунчаки бор гапни айтаяпман. Худога шукур, имкониятларимизни голга айлантирдик. Диққатимиз жамланган эди. Ғалаба қозондик, мухлисларни хурсанд қилдик. Худога шукур, учта гол урдим. Олдинга интилишда давом этамиз.

- Бугун хет-трик қайд этдингиз. Қолаверса, узоқ масофадан Бекхэм услубида гол уришингиз мумкин эди...
- Баъзида бирор ҳолат ўхшайди, баъзида ўхшамайди. Ҳаракат қилдим, лекин айнан ўша пайтда омад менга кулиб боқмади, дейиш мумкин. Айтмоқчиманки, энг муҳими - ғалаба қозондик, энг муҳими - гол урдим.

- Биз яқинда бўлиб ўтган Эль Классикога ўхшаш ўйин кўрдик. Лекин "Реал" мухлиси эканлигингизни инобатга олиб, сизни ўша беллашувдаги қайси юлдузга қиёслаш мумкин: Мбаппе ёки Рафинья?
- Йўқ, бу ҳақда гапирмаган бўлардим... Мени ким биландир таққослаш шарт эмас. У ерда жаҳон даражасидаги юлдузлар бор, шунинг учун мен ўзимни ҳеч ким билан солиштирмайман. Агар кимдир таққосласа, майли, мен ўзимни таққосламайман. Эл Класикога келсак, ростдан ҳам, ўйин чиройли, шиддатли ва қизиқарли бўлди. Ҳужум устига ҳужум бўлди, шунинг учун мухлисларга ҳам ёққан бўлса керак деб ўйлайман.

Манба: championat.asia «Замин»ни Telegram’да ўқинг!