Роналдунинг ўғли ҳам футбол юлдузига айланадими? Европа грандлари уни кузатишмоқда!

Дунё футболида афсоналардан бири сифатида тан олинган Криштиану Роналдунинг катта ўғли – Криштиану Жуниор отасининг изидан бориш учун катта қадам ташлади. 14 ёшли футболчи яқинда Хорватияда ўсмирлар ўртасида ўтказилаётган нуфузли халқаро турнирда Португалия ўсмирлар терма жамоасида ўзининг илк расмий ўйинини ўтказди.

Япониялик тенгдошлари билан бўлган баҳсда кичик Роналду гол ёки ассист билан кўзга ташланмаган бўлса-да, унинг ўйиндаги ҳаракатлари ва техник маҳорати Европанинг машҳур клублари скаутларининг диққат марказида бўлди.

Хорватиянинг Sportske Novosti нашри тарқатган маълумотларга кўра, Португалия ўсмирлар терма жамоаси иштирокидаги учрашувни “Манчестер Юнайтед”, “Тоттенхэм”, “Ювентус”, “Интер” ва “Аталанта” каби машҳур клубларнинг мутахассислари кузатиб борган. Шу билан бирга, Германия Бундеслигасидан ўнга яқин клубнинг селекция мутахассислари ҳам учрашувга ташриф буюришган ва Роналду Жуниорнинг потенциалини баҳолашган.

Ҳозирда кичик Криштиану отасининг Саудия Арабистонидаги “Ан-Наср” клубининг болалар жамоасида тўп сурмоқда. У бунга қадар Европанинг энг яхши клубларидан ҳисобланадиган “Реал Мадрид” ҳамда “Ювентус” академияларида профессионал тайёргарлик кўрган эди.

Отасининг юксак номига муносиб ворис бўлишга ҳаракат қилаётган Криштиану Жуниорнинг келажаги кўплаб футбол мутахассислари томонидан юқори баҳоланмоқда. Унинг техник маҳорати, тезлиги ва ҳаракатлари ҳозирданоқ Европанинг кучли чемпионатлари клубларининг диққат марказига тушган.

Бугунча кичик Роналдунинг терма жамоа таркибидаги илк баҳси унинг фаолиятидаги янги ва муҳим босқичнинг бошланиши бўлиши мумкин. Шубҳасиз, отасининг қўллаб-қувватлаши ва футбол оламининг юқори эътибори остида у профессионал футболда катта натижаларга эришиши мумкин.

Zamin.uz таҳририяти футбол юлдузининг ўғлига профессионал фаолиятида катта омад тилаб қолади! «Замин»ни Telegram’да ўқинг!