Осиё чемпионатида Акбар Жўраев чемпионликка эришди, Ўзбекистон медаллар жамғармоқда

Хитойда ўтаётган оғир атлетика бўйича Осиё чемпионати Ўзбекистон терма жамоаси учун ғалабалар билан давом этмоқда. Чемпионатнинг эркаклар ўртасидаги -109 кг вазн тоифасидаги баҳслари айниқса ўзбекистонлик спортчиларнинг юқори савияли чиқишлари билан эсда қоладиган бўлди.

Таниқли спортчи, Олимпиада ўйинлари чемпиони ва совриндори Акбар Жўраев яна бир бор ўзининг юқори маҳоратини намойиш қилиб, мусобақада барча рақибларини ортда қолдирди. У даст кўтаришда 183 килограмм, силтаб кўтаришда 223 килограммни бўйсундириб, иккикурашда умумий 406 килограмм натижа қайд этди. Бундай юқори кўрсаткичлар Акбарга ҳар уч йўналишда ҳам ғолиб бўлиш ва учта олтин медалга эга чиқиш имконини берди.

Шу билан бирга, бу вазн тоифасида яна бир истеъдодли ўзбекистонлик спортчи Шарофиддин Амриддинов ҳам муваффақиятли иштирок этди. У даст кўтаришда 181 килограмм, силтаб кўтаришда 214 килограмм ва иккикурашда 395 килограмм натижа қайд этиб, Акбардан кейин иккинчи ўринни эгаллади ва ўз ҳисобини учта кумуш медаль билан бойитди.

Акбар Жўраев ва Шарофиддин Амриддиновнинг бу муваффақиятлари Ўзбекистон терма жамоасига умумжамоа ҳисобида ҳам фойда келтирди. Ҳозирда терма жамоамиз 3 та олтин, 3 та кумуш ва 5 та бронза медаль билан жами 11 медалга эга бўлиб, умумжамоа ҳисобида шарафли учинчи ўринни эгаллаб турибди.

Турнирда ўзбекистонлик оғир атлетчиларнинг кўрсатаётган бундай юқори натижалари спорт мухлисларини ҳам мамнун этмоқда. Zamin.uz таҳририяти ҳамюртимиз бўлган спортчиларимизнинг муваффақиятлари давомли бўлишига ва мамлакатимиз спорт шарафини халқаро майдонларда янада юқори кўтаришларига ишонади. «Замин»ни Telegram’да ўқинг!