Довбик жароҳат олди: Шомуродов “Милан”га қарши асосий таркибда тушадими?

Римнинг “Рома” клуби сўнгги машғулотлардан бирида кутилмаган йўқотишга учради. Жамоа ҳужум чизиғининг асосий номзодларидан бири бўлган Артём Довбик “Милан”га қарши ўтадиган муҳим беллашув олдидан жароҳат олди. Бу ҳақда италиялик журналист Филиппо Биафора “Il Tempo” нашри орқали хабар тарқатди.

Маълумотларга кўра, украиналик тўпурар кеча бўлиб ўтган машғулот пайтида жароҳатланган ва айни пайтда тиббий текширувга юборилган. Яқин кунларда Довбикнинг соғлиғи ҳақида аниқ хулоса берилиши кутилаяпти. Унинг 19 май куни кечқурун, соат 23:45 да ўтиши режалаштирилган “Милан”га қарши учрашувда майдонга тушиши ҳозирча мавҳумлигича қолмоқда.

Aгар Артём жангга тайёр бўлмаса, у ҳолда асосий таркибда ўзбекистонлик Элдор Шомуродовнинг майдонга тушиши эҳтимоли юқори. Жамоа расмий сайтида келтирилган маълумотга кўра, мураббийлар штаби Шомуродовга ишониб, унга имконият беришни кўриб чиқмоқда.

Икки ҳужумчининг мавсум статистикаси

27 ёшли Артём Довбик жорий мавсум “Рома” сафида 45 та расмий учрашувда иштирок этиб, 17 та гол ва 4 та ассист билан ажралиб турди. Унга алтернатива сифатида кўрилаётган Элдор Шомуродов эса мавсум давомида 35 учрашувда майдонга тушиб, 7 та гол ва 5 та голли узатмани амалга оширган.

Икки жамоа ўртасидаги қарама-қаршилик Италия А Сериясининг энг қизғин беллашувларидан бири сифатида кўрилмоқда. “Милан” учун Европа йўлланмаси, “Рома” учун эса мавқе ва нуфуз масаласи долзарб.

Zamin.uz таҳририятидан:
Энди барча кўзлар “Рома” мураббийлар штаби томонидан қандай қарор қабул қилинишини кутмоқда. Элдор Шомуродов учун “Милан”га қарши асосий таркибда тушиш катта имконият бўлиши мумкин. Сиз Элдорнинг бу учрашувда қандай ўйин кўрсатишини кутяпсиз? «Замин»ни Telegram’да ўқинг!