Роналду футболка алмашишни рад этган ягона клубни айтди

Беш карра "Олтин тўп" соҳиби, ҳозирда Саудия Арабистонининг “Ал-Наср” жамоасида фаолият олиб бораётган португалиялик юлдуз Криштиану Роналду яқинда футболка алмашишни истамайдиган ягона клубни очиқлади. Бу ҳақда Championat нашри Give Me Sport манбасига таяниб хабар берди.

“Рома”га қарши ўйинда мендан гол урмасликни сўрашган”

Роналду 2006/07 йилги УЕФА Чемпионлар Лигаси чорак финал босқичидаги “Рома”га қарши ўйинни эслаб, ўша пайтда юз берган ноодатий ҳолат ҳақида гапирди:

“2007 йилда “Рома”га қарши ўйинда ҳисоб 6:0 эди. Улар биздан тўхташимизни сўрашди. Рақиб футболчилари гол урмасликни илтимос қилди. Ҳатто менга тан жароҳати етказиш билан таҳдид қилганлар ҳам бўлди. Шу сабабли, мен ҳеч қачон “Рома” футболчилари билан футболка алмашмаганман ва алмашмайман ҳам”, — деди португалиялик ҳужумчи.

Олд Траффорддаги тарихи кеча — 7:1

Эслатиб ўтамиз, 2007 йилги ўша ёрқин кечада “Манчестер Юнайтед” Римдаги илк баҳсда 1:2 ҳисобида мағлуб бўлган бўлса-да, жавоб учрашувида “Олд Траффорд”да “Рома”ни 7:1 ҳисобида мағлубиятга учратган. Роналду ўша баҳсда иккита гол муаллифига айланган эди ва бу унинг Европа миқёсидаги порлашида муҳим босқич бўлган.

Zamin.uz таҳририятидан:
Криштиану Роналду фаолияти давомида кўплаб катта рақиблар ва катта финалларга гувоҳ бўлди. Бироқ “Рома”га қарши ўша кеча унинг хотирасида бутунлай бошқача из қолдирган кўринади. Сиз Роналдунинг бу эътирофини қандай баҳолайсиз? «Замин»ни Telegram’да ўқинг!