Кака: Бразилия термасига ёрдам беришга тайёрман!

Жаҳон футболида ўчмас из қолдирган афсонавий ярим ҳимоячи, “Реал”, “Милан” ва Бразилия терма жамоаси собиқ юлдузи Кака яна миллий терма жамоа билан ҳамкорлик қилишга тайёр эканини маълум қилди. Унинг сўзларига кўра, агар “селесао” унинг ёрдамига муҳтож бўлса, у юртига хизмат қилишга доим рози.

“Агар терма жамоа менинг тажрибам ва билимимдан фойдаланишни истаса, мен тайёрман. 2017 йилда футболчилик фаолиятимни тугатганман, лекин шу вақтдан бери бекор ўтирганим йўқ — Гарвард университетида спорт бизнеси бўйича таҳсил олдим, УЕФАнинг спорт менежменти дастурини якунладим ва Бразилия футбол конфедерациясида мураббийлик курсларини ҳам тамомладим. Менда 15 йиллик терма жамоа тажрибаси ва учта Жаҳон чемпионатида иштирок этиш орқали йиғилган билим бор. Ўзимни тайёр ҳис қиляпман,” – деди Кака O Globo нашрига.

Қайд этиш жоиз, 12 май куни Бразилия терма жамоаси расман италиялик мутахассис Карло Анчелоттини бош мураббий этиб тайинлаганини маълум қилганди. Шунингдек, маҳаллий ОАВларда Анчелотти ўзининг “Милан”даги шогирди Какага терма жамоада мураббийлар штабида жой таклиф этмоқчи экани ҳақида маълумотлар пайдо бўлганди.

Машҳур плеймейкернинг қайтиши “селесао” учун нафақат мотивация, балки тажрибавий қўллаб-қувватлаш бўлиши мумкин. Айниқса, янги босқичда мураббийлар штабида шундай нуфузли номларнинг бўлиши терма жамоа учун жуда муҳим.

Zamin.uz таҳририяти Кака ва Бразилия терма жамоасидаги янгиликларни диққат билан кузатишда давом этади. Сиз Каканинг мураббий сифатидаги имкониятларини қандай баҳолайсиз? У термага қайси жиҳатда ёрдам бера олади, деб ўйлайсиз? «Замин»ни Telegram’да ўқинг!