“Сити” афсонасига эҳтиром: де Брюйне ҳайкали ўрнатилади

“Манчестер Сити” клуби тарихида муҳим из қолдирган Кевин де Брюйне фаолиятидаги яна бир тўлқинли саҳифа ёпилди. Бугунги “Борнмут”га қарши АПЛнинг 37-туридаги баҳс белгиялик маэстро учун “Этихад”даги сўнгги уй ўйини бўлди. Клуб раҳбарияти эса унга бўлган эъзозни махсус ҳайкал билан ифода этишга қарор қилди.

“Этихад”даги шарафли қаторга қўшилди

“Манчестер Сити” расман “Этихад Стэдиум” атрофида Кевин де Брюйне ҳайкали ўрнатилишини эълон қилди. У ушбу шарафга сазовор бўлган еттинчи футболчига айланади. Аввалроқ Венсан Компани, Давид Сильва, Серхио Агуэро, Майк Саммерби, Фрэнсис Ли ва Колин Белл каби клуб афсоналари ҳайкал билан абадийлаштирилган эди.

“Бу менинг юрагимда абадий боғланишни англатади”

BBC телеканалида эфирга узатилган “Match of the Day” дастурида де Брюйне шундай деди:

“Бу мен доимо ушбу клубнинг бир қисми бўлиб қолишимни англатади. Қачон оилам ва дўстларим билан бу ерга қайтсам, ўзимни кўра оламан. Демак, мен ҳар доим “Сити” билан бирга бўламан.”

9 йиллик ҳаёт ва 19 та соврин

Кевин де Брюйне 2015 йил ёзида “Вольфсбург”дан “Манчестер Сити”га келганди. Шундан бери у клуб сафида 421та ўйинда майдонга тушиб, 108 та гол урди ва 177 та голли узатма билан ҳамюртларини қувонтирди. Бу вақт мобайнида “шаҳарликлар” таркибида 19 та соврин қўлга киритди — жумладан, Чемпионлар Лигаси, беш марта АПЛ чемпионлиги ва Англия Кубоги.

Zamin.uz таҳририятидан:
Кевин де Брюйне “Манчестер Сити” тарихидаги энг таъсирли футболчилардан бири бўлиб қолади. Унинг интеллектуал ўйини, етакчилик қобилияти ва гўзал паслари уни нафақат “Сити” мухлислари, балки бутун футбол оламида севимли қаҳрамонга айлантирди.

Сиз нима деб ўйлайсиз — де Брюйне афсона сифатида муносиб кузатилди деб ўйлайсизми? «Замин»ни Telegram’да ўқинг!