Де Брюйне “Наполи” ёки АҚШ? Миллион долларлик танлов қаршисида

“Манчестер Сити” сафида 10 йиллик муваффақиятли фаолияти билан жамоа тарихи ва Премьер-лига юлдузларидан бирига айланган Кевин Де Брюйне олдида муҳим қарор турибди. 33 ёшга кирган бельгиялик плеймейкер навбатдаги мавсумни қаерда ўтказишини аниқлаши лозим.

Европа, Саудия Арабистони ва Америка клубларидан қизғин таклифлар бор. Европа нашрларининг хабар беришича, де Брюйне Италия А Сериясидаги янги чемпион — “Наполи” билан музокараларни якунига етказган ва молиявий шартлар бўйича келишувга эришган.

Бироқ янги бурилиш кутилмаганда АҚШдан келди. “Чикаго Файр” клуби Кевинга ҳар мавсум учун 12 миллион долларлик шартнома таклиф қилди. Бу эса “Наполи”нинг таклифидан икки баробар юқори.

Таниқли инсайдер Бен Жейкобснинг таъкидлашича, айнан мана шу таклиф Де Брюйнени иккилантириб қўйган. Чунки молиявий жиҳатдан Америка таклифи жуда жиддий. Бундан ташқари, 2026 йилги жаҳон чемпионати қисман АҚШда ўтиши ҳам футболчи учун қўшимча мотивация бўлиши мумкин.

Кевин Де Брюйне спорт карьерасидаги кейинги босқични шон-шараф ва ўзини бошқача муҳитда синаб кўриш билан боғламоқчи. “Наполи”да у чемпион жамоага етакчи сифатида келади, АҚШда эса янги футбол даврининг юзига айланиши мумкин.

Футбол оламида ҳаммани қийнаётган савол: Де Брюйне “Наполи”нинг ажойиб лойиҳасини танлайдими ёки “Чикаго Файр”нинг рекорд маошини қабул қиладими? Жавоб яқин кунларда маълум бўлади.