Конференциялар Лигаси финали: "Бетис" ва "Челси" ўртасидаги тўқнашувга бағишланган катта таҳлил

Европа футболининг қизғин палласини бошдан кечираётган фурсатда Конференциялар Лигаси финали ҳам ишқибозлар учун юқори даражадаги футбол тақдим этиш арафасида. Польшада бўлиб ўтадиган ҳал қилувчи учрашувда Испаниянинг "Бетис" клуби Англия гранди "Челси"га қарши тўқнаш келади. Икки жамоа ҳам турли ҳолатда, турли руҳда ва алоҳида сценарийда финалга етиб келди. Келинг, бу жанг олдидан жамоаларнинг ҳолати, таркибий муаммолари ва имкониятларини таҳлил қиламиз.

"Бетис" — Узоқ ва машаққатли йўл орқали финалга етиб келган жамоа

Мануэль Пеллегрини бошқарувидаги "Бетис" жорий мавсумда барқарорлик билан фарқланмади. Айниқса, мавсумнинг сўнгидаги сўнги беш учрашувда жамоа бирорта ғалаба қайд этолмади: битта йирик мағлубият ("Атлетико Мадрид"дан 1:4) ва тўртта дуранг. Шунга қарамай, жамоа енгилмаслик кайфияти ва стратегик ёндашувлар орқали финалгача етиб келди. Қўшимча саралаш босқичидан финалгача бўлган узоқ йўл эса бу муваффақиятнинг қанчалик катта меҳнат эвазига қўлга киритилганини кўрсатади.

Жамоа таркибида жиддий йўқотишлар бор

"Бетис" финал олдидан бир қатор муҳим футболчилардан маҳрум бўлди. Ҳимояда Бельерин ва Льоренте, ҳужумда Авила, дарвозабонда эса асосий кипер Фран Виейтеснинг ўйинда қатнашиши номаълум. Уни алмаштирувчи Адриан тажрибали бўлса-да, ундан юқори даражадаги ўйин талаб этилади. Юссуф Сабали ва Жонни Кардосо каби ўйинчиларнинг ҳам иштирок этиши сўроқ остида.

"Бетис" — Гол урса, камдан-кам мағлуб бўлади

Бу мавсум Конференциялар Лигасидаги плей-офф босқичида "Бетис" илк голни урса, камдан-кам ҳолатда мағлуб бўлган. Бу жамоанинг курашувчанлиги ва устунликни сақлаб қолиш қобилиятидан далолат. Гентга қарши 0:1 ҳисобидаги ўйин бунга истисно бўлди. Бундан келиб чиқиб, финалда ҳисобни очиш "Бетис" учун жуда муҳим бўлади.

"Челси" — Янги даврнинг тўлиқ кайфиятида

"Челси" учун мавсумнинг охири яхши якунланди. Энцо Мареска шогирдлари сўнги икки учрашувда “Манчестер Юнайтед” ва “Ноттингем Форест”ни 1:0 ҳисобида мағлуб этиб, Чемпионлар Лигаси йўлланмасини қўлга киритишди. Финал олдидан жамоада катта мотивация мавжуд — сўнги 12 учрашувда фақат бир марта мағлубият, қолган 11 баҳсда эса ғалаба. Мавсумни Европа соврини билан якунлаш — Лондон клуби учун идеал сценарий бўлади.

Таркибий йўқотишлар — Лекин барқарор шакл сақланмоқда

Финал олдидан "Челси" таркибида марказий ҳимоячи Уэсли Фофана ва ҳужумкор ярим ҳимоячи Омари Келлиманнинг йўқлиги маълум. Нкунку ва Марк Гиу каби ҳужумчиларнинг иштирок этмаслиги эҳтимоли ҳам мавжуд. Шу билан бирга, "Ноттингем"га қарши ўйинда Энцо Мареска асосий таркибда деярли ўзгариш қилмади. Финал учун ҳам Николас Жексон ва дарвозабон Йоргенсен асосий таркибда майдонга тушиши кутилмоқда.

Ҳужумдаги муаммолар — Фақат бир гол...

Охирги тўрт учрашувда “Челси” бор-йўғи 3 гол ура олди ва ҳар бир ўйинда фақат 1 тадан гол. Ваҳоланки, жамоа ҳар бир ўйинда ўртача 3 xG (кўрилган имконият) ярата олмоқда. Демак, муаммо имконият ярата олишда эмас, балки уларни голга айлантиришда. Бу муаммо финалда ҳал этилмаса, "Бетис"нинг жавоби жуда ноқулай бўлиши мумкин.

Хулоса: Ким фаворит?

Қўлдаги маълумотларга таянган ҳолда, "Челси" — тажриба, таркибий барқарорлик ва руҳий кайфият борасида афзал. Бироқ "Бетис" каби жамоалар учун бу каби финаллар — ҳаётда бир мартаги имконият. Агар Пеллегрини шогирдлари ҳисобни биринчилар бўлиб очишса, "аристократлар" учун жавоб бериш осон бўлмайди.

Конференциялар Лигаси финали жонли тарих яратиши мумкин — ҳар икки жамоа ҳам ўзига хос сценарийда ғалабага муносиб. 5 июн куни Полшадаги ушбу тўқнашув Европанинг ёздаги энг ёрқин финалларидан бири бўлиши шубҳасиз.