“Челси” Европа чемпиони! Мареска ва Палмер ғалаба ҳақида фикр билдирди

Европа Конференциялар лигаси финалида “Челси” катта маҳорат ва тажриба кўрсатган ҳолда “Бетис” устидан 4:1 ҳисобида йирик ғалабага эришди. Бу натижа орқали “Аристократлар” ўз тарихларига яна бир халқаро совринни қўшишди. Ушбу йирик муваффақиятдан сўнг клуб бош мураббийи Энзо Мареска ва финалда ёрқин ўйин кўрсатган Коул Палмер журналистлар саволларига жавоб берди.

Энзо Мареска (бош мураббий):
— Биринчи бўлимда ўзимиздан кутган ўйинни кўрсатолмадик. “Ноттингем Форест”га қарши ўйиндан кейинги эмоционал чиқишимиз салбий таъсир қилди. Лекин иккинчи таймда жамоа ўзини йиғиб олди ва курашиб, натижага эришди. Бизда дам олиш учун кам вақт бўлди, шунга қарамасдан футболчилар кучли ирода намоён этди.

Мареска айрим футболчилар ҳақида алоҳида тўхталиб ўтди:

— Рис Жеймс ҳар доим асосий таркибда бўлишини хоҳлайман, лекин уни ҳозирча эҳтиёт қиляпман. Мало Густо ёш футболчи, хатолари табиий. Биз унинг ўсишига сабр билан ёндашамиз. Унинг салоҳиятига ишонаман.

— Бу ғалаба клуб учун жуда муҳим. Мухлисларимиз учун ҳам шундай. Бу ғалаба орқали биз янги босқичга ўтамиз. Клуб молиявий жиҳатдан катта сармоя киритган, энди эса биз келгуси мавсум учун стратегия устида иш олиб борамиз, — дея қўшимча қилди мураббий.

Коул Палмер (жамоа етакчиси):
— Финалда иккита ассист билан жамоамнинг ғалабасига ҳисса қўшдим. Бу менинг шахсий фаолиятимда унутилмас лаҳза бўлди. Бундай ўйинлар орқали ўзингга бўлган ишонч янада ортиб боради. Жамоам учун ҳар қандай паллада юракдан ҳаракат қиламан.

Палмер финалдаги ҳаракатлари билан яна бир бор ўзини юқори даражадаги ўйинчи сифатида кўрсата олди. Унга нисбатан мухлислар ва таҳлилчиларнинг ишончи ортиб бормоқда.

“Челси”нинг ушбу ғалабаси жамоа учун нафақат соврин, балки янги давр бошланиши сифатида қаралмоқда. Энзо Маресканинг шижоати ва Палмер сингари ёш юлдузларнинг порлаши “Аристократлар”нинг келажакдаги юқори марраларга интилишини янада равшан қилиб турибди. Zamin.uz ушбу ғалабани футбол оламидаги энг муҳим воқеалардан бири сифатида қайд этди.