Роналдунинг ўрнига топилган янги юлдуз: «Ан-Наср» кимни нишонга олди?

Саудия Арабистонининг «Ан-Наср» клуби асосий юлдузи Криштиану Роналду билан янги шартнома имзолаш масаласида муаммоларга дуч келмоқда. Жамоанинг спорт директори Фернандо Йерронинг айтишича, португалиялик юлдуз билан шартномани узайтириш борасидаги музокаралар кўнгилдагидек кечмаяпти. Маълум бўлишича, Роналду мавсум давомида клуб раҳбарияти олдига бажарилиши қийин бўлган бир қатор талабларни қўйиб келган ва бу эса музокараларнинг издан чиқишига сабаб бўлган.

Испаниялик мутахассиснинг таъкидлашича, «Ан-Наср» раҳбарияти Роналдунинг клубни тарк этиши эҳтимолига тайёр турибди ва ҳатто унинг ўрнига келадиган янги юлдуз футболчини ҳам белгилаб қўйган. Клуб бунинг учун Англиянинг янги чемпионлари ҳисобланган «Ливерпуль»нинг истеъдодли ҳужумчиси Луис Диасни нишонга олгани маълум бўлди.

Колумбиялик истеъдод эгаси бўлган Луис Диас ўтган мавсумда ўзининг ажойиб ўйинлари билан жамоасига катта ёрдам берди. Барча турнирларда «Ливерпуль» либосида 50 марта майдонга тушган Диас, рақиб дарвозаларини 17 марта ишғол қилиб, яна 8 марта голли паслар билан ажралиб турди. Унинг тезкорлиги, техник маҳорати ва майдондаги кутилмаган ҳаракатлари кўплаб клублар эътиборини ўзига тортмоқда.

Бу вазиятдан хабардор бўлган «Ливерпуль» раҳбарияти эса ўз юлдуз футболчисига бўлган қизиқишдан ташвишга тушиб қолди. Англиянинг чемпион клуби Луис Диасни қўлдан чиқариб юбормаслик мақсадида футболчи билан тез орада янги ва яхшиланган шартнома тузиш чораларини кўрмоқда.

Ҳозирги вақтда «Ан-Наср» Роналду билан шартномани узайтира олмаслик хавфи юқори бўлгани сабабли, клуб раҳбарияти Луис Диасни жамоага жалб қилиш учун жиддий ҳаракат бошлаб юборган. Агар бу трансфер амалга ошса, колумбиялик юлдуз Роналдунинг ўрнини босиши мумкин бўлган асосий номзодга айланади.

Бу трансфер борасидаги воқеалар қандай якунланиши ҳозирча номаълум, аммо футбол мухлислари «Ан-Наср» ва «Ливерпуль» ўртасидаги бу қизғин музокараларни диққат билан кузатиб бормоқда. Ҳар ҳолда, клуб раҳбарлари Роналдунинг ўрнини босиш учун бор имкониятларини ишга соладиган кўринади.