Анчелотти Бразилияга қандай ўтган? ФИФА расмий суриштирув бошлади!

Футбол оламида катта шов-шувларга сабаб бўлган навбатдаги воқелик: Италиялик машҳур мутахассис Карло Анчелоттининг Бразилия терма жамоасига тайинланиши ФИФА томонидан расмий текширув остига олинди. Бразилия футбол конфедерацияси (CBF) мазкур текширув ҳақида ФИФАдан расмий хат олганини тасдиқлади.

ФИФА текширувининг асосий сабаби — Анчелоттининг Бразилияга ўтиши жараёнида агентлик фаолиятига оид халқаро қоидалар бузилган бўлиши мумкинлиги билан боғлиқ. Хусусан, Анчелоттининг вакили Диего Фернандес агентлик лицензиясига эга бўлмаган ҳолда 1,2 миллион евро миқдорида комиссия олишни кўзда тутган.

ФИФА томонидан юборилган хатда шундай дейилади:

“Жаноб Диего Фернандес ҳозирда агент сифатида рўйхатдан ўтмаган, бироқ у Карло Анчелоттини “Реал”дан Бразилия терма жамоасига ўтиш жараёнида фаол иштирок этган ва агентлик хизматларини амалга оширган.”

Бу ҳолат ФИФАнинг 2023 йилдан кучга кирган янги агентлар низомларига зид ҳисобланади. Унга кўра, агентлик хизматларини фақатгина расмий лицензияга эга шахслар амалга ошириши мумкин.

ФИФА Бразилия футбол конфедерациясидан қуйидагиларни тақдим этишни талаб қилган:

• Диего Фернандес иштирок этган барча музокаралар ва учрашувлар ҳақидаги маълумотлар.
• Фернандеснинг имзоси тушган ҳар қандай шартномалар.
• Тўланган маблағлар ҳақида молиявий ҳисоботлар.
• CBFнинг ушбу масала бўйича расмий изоҳи.

CBF томонидан берилган жавобда эса текширувга доир қуйидаги маълумотлар берилган:

“Карло Анчелоттини Бразилия терма жамоасига жалб қилиш музокаралари ташкилотнинг олдинги раҳбарияти даврида ўтказилган. Барча келишувлар махфий шартномалар асосида амалга оширилган. Ҳозирги маъмурият бу масалани ички равишда ўрганмоқда.”

Бу орада Анчелоттининг вакили Диего Фернандес ҳам масалага муносабат билдириб ўтди. Унинг таъкидлашича, у ўзини агент сифатида эмас, маслаҳатчи сифатида иш олиб борган:

“Музокаралар жуда қисқа муддатда ўтказилгани туфайли мен ФИФА рўйхатига агент сифатида киришга улгурмадим. Яқин кунларда расмий агент сифатида рўйхатдан ўтаман ва шундан сўнг хизматларим учун ҳақ олишга умид қиламан.”

Ушбу воқеа футбол оламида катта муҳокамаларга сабаб бўлмоқда. Бу воқелик нафақат Бразилия терма жамоаси билан боғлиқ тайинловларга, балки бутун футбол агентлиги тизимига оид масалаларни қайта кўриб чиқиш зарурлигини кўрсатмоқда.

Zamin.uz таҳририяти бу масала бўйича барча ривожларни кузатиб бориб, сизни долзарб маълумотлар билан хабардор қилиб боради. Анчелотти каби мураббий атрофидаги шов-шувлар ҳали узоқ вақт футбол муҳитидан кетмайди, шекилли.