ФИФА раҳбари Инфантино Ўзбекистонни мундиал йўлланмаси билан табриклади

ФИФА президенти Жанни Инфантино Ўзбекистон миллий терма жамоасини 2026 йилда Канада, Мексика ва АҚШ мезбонлик қиладиган Жаҳон чемпионатига йўлланма олгани муносабати билан табриклади.

Инфантино ўзининг расмий табригида Ўзбекистоннинг йиллар давомида халқаро футболда орттирган тажрибасини, ёшлар ва олимпия терма жамоаларидаги ютуқларини эътироф этиб, “Оқ бўрилар”нинг жаҳон чемпионатида дебют қилиши бутун футбол олами учун катта воқеа эканини таъкидлади.

"Ўзбекистон, ФИФА Жаҳон чемпионатига хуш келибсиз!" — деб бошлади ўз табриғини Инфантино.

“Сизни 2026 йилда Канада, Мексика ва АҚШда бўлиб ўтадиган мундиалга тарихий йўлланмани қўлга киритганингиз билан чин дилдан муборакбод этаман.

Ўзбекистон 1994 йилдан буён ФИФА аъзоси сифатида ёшлар ўртасидаги бир қатор мусобақаларда ва Олимпия ўйинларида муносиб қатнашиб келмоқда. Энди эса ажойиб саралаш натижалари орқали сизнинг миллий термангиз ҳақли равишда катта саҳнада ўз ўрнига эга чиқди.

Миллионлаб мухлислар 'Оқ бўрилар'нинг Жаҳон чемпионатидаги илк қадамларини катта интизорлик билан кутмоқда”, — дейилади табрик мактубида.

Эътиборли нуқта: тарихий дебют

Ўзбекистон миллий терма жамоаси ўз тарихида биринчи марта Жаҳон чемпионати финал босқичига чиқишга муваффақ бўлди. Мазкур ютуқ нафақат спорт, балки мамлакат нуфузи ва футболнинг оммавийлашуви нуқтаи назаридан ҳам катта аҳамиятга эга.

Инфантинонинг шахсан йўллаган табриги эса Ўзбекистоннинг халқаро миқёсдаги эътирофини янада мустаҳкамлайди.

Ўзбекистон футбол тарихида янги саҳифа очилди. Энди "Оқ бўрилар"ни нафақат Осиё майдонларида, балки Жаҳон чемпионатида — футболнинг энг олий саҳнасида кўрамиз.

Тарихий йўлланма эгаларига яна бир бор табриклар! Олға, Ўзбекистон!