Де Брюйне “Фенербахче”га ўтиши мумкин — музокара қизғин

Англиянинг “Манчестер Сити” жамоасида узоқ йиллардан буён юқори савияда тўп суриб келаётган Кевин Де Брюйне карьерасида янги босқич бошланиши мумкин. Белгиялик маҳоратли ярим ҳимоячи энди фаолиятини Туркия Суперлигасида давом эттириш эҳтимоли ортиб бормоқда.

Mashhur инсайдер Жанлука Ди Марцио тарқатган маълумотга кўра, Истанбулнинг “Фенербахче” клуби 33 ёшли футболчи трансфери бўйича жуда фаол ҳаракат қилмоқда ва унга Италиянинг “Наполи” клубига нисбатан анча фойдали ва маош жиҳатдан манфаатлироқ таклиф йўллаган.

Айни пайтда “Фенербахче” жамоаси рулда Жозе Моуриньо каби тажрибали мураббий турибди ва айнан у Де Брюйнени ўз схемасига мос футболчи сифатида кўрмоқда. Моуриньонинг режаларида Кевинга катта ўрин берилгани айтилмоқда.

Шу боис, Де Брюйне энди туркиялик грандга ўтиш масаласини жиддий тарзда кўриб чиқмоқда. Унинг фаолиятидаги кейинги босқич қандай кечиши ва қайси клуб билан ҳамкорлик қилишини аниқлаш учун энди кўп кутилмайди — қарор яқин соатларда эълон қилиниши кутилмоқда.

Маълумот ўрнида, Кевин Де Брюйненинг “Манчестер Сити” билан амалдаги шартномаси 2025 йил 30 июнгача амал қилади. Ундан сўнг футболчи эркин агент мақомини қўлга киритади ва уни трансфер учун харид қилиш шарт бўлмайди.

Aгар бу трансфер амалга ошса, бу нафақат Туркия футболи учун, балки Европа футбол бозоридаги катта воқеалардан бирига айланиши шубҳасиз. Чунки Де Брюйненинг тажрибаси ва ўйин сифати “Фенербахче”нинг чемпионлик юришларига янги руҳ бағишлаши мумкин.

Кевиннинг янги манзили ва Моуриньо қўл остидаги келажаги футбол мухлислари учун катта қизиқиш уйғотмоқда. «Замин»ни Telegram’да ўқинг!