Роналдунинг жонкуярлиги: «Оёғим синса ҳам майдонни тарк этмасдим!»

Жаҳон футболи юлдузи, Португалия миллий терма жамоаси ҳужумчиси Криштиану Роналду Миллатлар Лигаси финалида кўрсатган жонкуярлиги ва профессионаллиги билан яна бир бор мухлисларнинг қалбини забт этди. Испания терма жамоасига қарши кечган драматик финалда (2:2, пенальтилар сериясида 5:3) Роналду нафақат жамоаси учун муҳим голни урди, балки ўйиннинг ҳал қилувчи палласида оғир жароҳат олганига қарамай, охиригача курашиб, катта жасорат кўрсатди.

Marca нашрига берган интервьюсида Роналду шундай деди:
«Ҳақиқатан ҳам бу жароҳат мени анча аввалдан безовта қилаётган эди. Мен бу муаммони чигалёзди пайтидаёқ ҳис қилгандим ва бу оғриқ кучайиб борди. Лекин бу финал эди, Ватаним учун, жамоам учун майдонга тушишим керак эди. Агар керак бўлганда, ҳатто оёғимни синдиришга тайёр эдим. Миллий терма жамоа шарафи учун бор кучимни ишга солдим ва бу сафар ҳам шундай бўлди. Гол урдим, жамоамга ёрдам бердим, шундан кейин бор имкониятимни ишлатиб, охиригача ўйнадим».

Ўйиннинг 88-дақиқасида эса Роналдунинг жароҳати янада оғирлашди ва у захирага олишга мажбур бўлди. Аммо шу пайтгача португалиялик юлдуз ўзининг юксак профессионаллиги ва жамоадошлари олдидаги масъулиятини яна бир бор исботлади. Мазкур вазият бутун стадионда йиғилган мухлислар томонидан тик туриб олқишланди.

Шу билан бирга, терма жамоанинг бош мураббийи ҳам ўз интервьюсида Роналдунинг бу хатти-ҳаракатига алоҳида урғу берди: «Роналду ҳақиқий етакчи эканлигини яна бир марта кўрсатди. У ҳеч қандай жароҳатга қарамай, майдондаги ҳар бир дақиқани Ватани учун ўтказадиган ажойиб профессионал. Бу бизнинг ёш футболчиларимиз учун катта ибрат намунаси бўлиши керак», – деди мураббий.

Роналдунинг келажакдаги режалари ҳақида саволга жавоб берар экан, футболчи ҳозирча бу ҳақда фикр юритмаётганини таъкидлади: «Мен ҳозирги ҳолатимга ва жароҳатимни тиклашга диққат қаратишим керак. Терма жамоа учун ҳар доим охиригача курашганман ва шундай бўлиб қолади. Ҳозир эса қисқа муддатдаги режаларимни ўйлаяпман. Барча нарса аста-секин ҳал бўлади, муҳим нарса соғлигимни тиклашдир».

Айтиш мумкинки, Криштиану Роналду бу ғалаба билан ўзининг миллий терма жамоа сафидаги тарихида яна бир ёрқин саҳифа очди. Унинг жароҳатланган ҳолда ҳам майдонга чиқиб, ўзини аямасдан жанг қилгани кўплаб ёш футболчиларга ўрнак бўладиган хатти-ҳаракатдир. Унинг бу каби жасорати ва профессионаллиги ҳам мухлислар, ҳам футбол жамоатчилиги томонидан юқори баҳоланиб, ижтимоий тармоқларда кенг муҳокамаларга сабаб бўлмоқда.

Ҳозирча футболчи жароҳатидан тикланиш даврини бошлаши керак бўлади. Аммо мухлислар уни яна майдонда порлашини сабрсизлик билан кутмоқда. Роналду эса ўз навбатида майдонга қайтиш учун бор кучини сарфлайди ва унинг бу қайтиши янада ёрқин бўлишига шубҳа йўқ. «Замин»ни Telegram’да ўқинг!