Қатарлик Ал-Жани: “Ўзбекистонга қарши охирги қадам олдинда”

Қатар миллий терма жамоасининг ёш ва иқтидорли футболчиси Аҳмад Ал-Жани жаҳон чемпионати 3-саралаш босқичининг якунловчи — 10-туридан ўрин олган Ўзбекистонга қарши учрашув арафасида журналистларга ўз фикрларини билдирди.

24 ёшли вингер ушбу ўйин жамоаси учун муҳим босқич эканини таъкидлади:

“Олдимизда Ўзбекистонга қарши жуда масъулиятли учрашув турибди. Биз плей-офф босқичига йўл олдик, демак, мундиалга бориш учун энди фақатгина сўнгги қадам қолди,” — деди Ал-Жани.

Футболчининг таъкидлашича, терма жамоа яқинда мураббий алмашганига қарамай, жамоадаги руҳ ва мақсад ўзгармаган:

“Ҳа, жамоамизда янги мураббий иш бошлади, аммо жамоавий муҳит, бирлик ва мақсад — ҳамон ўша. Биз барчамиз бир ёқадан бош чиқариб, жаҳон чемпионатига етиб боришни истаймиз. Худо хоҳласа, бу орзумизга бирга етишамиз,” — деб қайд этди Аҳмад Ал-Жани.

Эслатиб ўтамиз, жаҳон чемпионатига саралашнинг 3-босқичидаги Ўзбекистон – Қатар учрашуви 10 июнь куни Тошкентдаги “Бунёдкор” стадионида бўлиб ўтади. Унда мезбонлар саралашни муддатидан аввал муваффақиятли якунлаган бўлса, Қатар терма жамоаси плей-офф босқичи орқали мундиал йўлланмаси учун курашни давом эттиради.

Ал-Жанининг қайд этишича, Қатар жамоаси Ўзбекистонга қарши баҳсни жуда жиддий тайёргарлик билан қарши оляпти ва бу учрашув улар учун янги босқичнинг бошланиши бўлиши мумкин.

Футбол мухлислари эса икки жамоа ўртасидаги қизғин тўқнашувни кутмоқда. Чунки бу ўйин нафақат натижа, балки икки терманинг келгуси мақсадларини белгилаб берадиган синов ҳам ҳисобланади. «Замин»ни Telegram’да ўқинг!