"Реал"да янги ҳимоячи: Александр-Арнольд расман тақдим этилди

Мадриднинг машҳур "Реал" клуби бугун яна бир муҳим трансферни амалга оширди — англиялик ҳимоячи Трент Александр-Арнольд расман жамоа аъзосига айланди.

Бугун эрталаб футболчи клубнинг расмий тиббий марказига ташриф буюриб, тиббий кўрикдан муваффақиятли ўтди. Текширув якунларидан сўнг "қироллик клуби" футболчини жамоанинг янги аъзоси сифатида оммавий равишда таништирди.

Тантанали тақдимот маросими "Сантьяго Бернабеу"да ўтказилди. Унда клуб президенти Флорентино Перес шахсан иштирок этди ва янги футболчига рамзий 12-рақамли форма ҳамда эсдалик совғасини топширди. Расмий суратларда Перес ва Трент биргаликда совринлар залида фотосуратга тушгани ва мадридликлар тарихидаги 15 та Чемпионлар лигаси кубогини томоша қилаётгани акс этган.

Александр-Арнольд бу трансфер билан "Ливерпуль"дан кейин фаолиятида янги босқични бошлади. Эътиборлиси, у "Реал Мадрид"га эркин агент сифатида келди. Мадридда унга катта ишонч билдирилаётгани, тантанали қабул ва рақамли формага унинг исми туширилгани орқали кўзга ташланади.

Ҳимоячи сўнгги йилларда нафақат Англияда, балки бутун Европада ўз позициясида энг иқтидорли футболчилардан бири сифатида тан олинган. Унинг "Реал"га келиши клубнинг келгусидаги режалари ва Чемпионлар лигаси каби муҳим мусобақаларда юқори мақсадлар сари ҳаракатини янада кучайтириши кутилмоқда.

Шу тариқа, Трент Александр-Арнольд расман "Реал Мадрид" футболчисига айланди ва жамоа сафидаги илк мавсумидаёқ катта мақсадлар сари юришга тайёр экани кўзга ташланмоқда. Мухлислар эса бу трансфердан катта умид қилишмоқда.