Суперлигада нархи энг тез ошган футболчилар рўйхати янгиланди

Transfermarkt портали Ўзбекистон Суперлигаси ва Про лигасида тўп сураётган футболчиларнинг бозор қийматлари янгилангани ҳақида маълум қилди. Бу галги янгиланишда айрим футболчиларнинг нархи кескин ошгани мухлислар эътиборини тортмоқда.

Рейтингнинг энг юқори поғонасида "Навбаҳор" марказий ҳимоячиси Гильерме Гедеш жой олди. Яқиндагина Бразилиянинг Д Сериясидан келиб қўшилган Гедеш биринчи марта бозор қийматига эга бўлди ва унинг нархи бир зумда 400 минг еврога ошди. Бу ҳимоячи ўз клубида ишончли ўйин намойиш этиб, жамоасининг муваффақиятига катта улуш қўшаётганини исботлади.

Шу билан бирга, "Навбаҳор"нинг яна беш футболчиси нархи ошган футболчилар рўйхатидан жой олгани клуб учун қувончли янгилик бўлди. Русланбек Жиянов (600 минг евро, +200 минг), Аббос Ғуломов (500 минг евро, +200 минг), Алишер Одилов (600 минг евро, +150 минг), Шоҳмалик Комилов (250 минг евро, +200 минг) ва Абдураззоқ Абдураззаков (500 минг евро, +150 минг) ҳам ўз қийматларини кўтаришга эришди. Бунинг ўзи "Навбаҳор" сафида ёш ва истиқболли футболчиларнинг етиштирилаётганидан далолат беради.

Иккинчи ўринда "Насаф" ярим ҳимоячиси Акмал Мозговой бор. Унинг бозор қиймати 1,5 миллион еврога етди ва бу ҳам +200 минг евро ўсиш ҳисобланади. Мозговой жамоанинг етакчиларидан бири сифатида ўйинларни юқори даражада ўтказмоқда.

Рўйхатда яна бир тажрибали ҳужумчи — Игорь Сергеев ҳам бор. Унинг қиймати 1 миллион еврога кўтарилди ва бу +200 минг еврога тенг. Сергеев жорий мавсумда “Пахтакор” сафида ажойиб ўйин кўрсатиб, 12 ўйинда 10 та гол ва 2 та ассист билан жамоасининг асосий тўпурари бўлиб турибди. Мазкур кўрсаткич унинг нархи ошишига олиб келди ва футболчи ўзининг юқори спорт формасини сақлаб қолишга муваффақ бўлди.

Кўпчиликнинг эътиборини тортган яна бир ҳолат – "Динамо" таркибида ҳам бир қатор футболчиларнинг қиймати ошгани. Дарвозабон Равшанбек Ягудин, ҳимоячи Жаҳонгир Ўрозов, ярим ҳимоячилар Ратиньо ва Ойбек Ўрмонжонов, шунингдек, ҳужумчи Фирдавс Абдураҳмонов ўз нархларини кўтаришга эришган.

Шу тариқа, сўнгги янгиланишлар футболчиларга бўлган қизиқиш, уларнинг салоҳияти ва майдондаги ишончли ўйини натижасида нархлар ўсишда давом этаётганини кўрсатади. Суперлига клублари сафидаги ёш, маҳоратли ва тажрибали футболчилар бозорда ўз қийматларини янада ошириш имкониятига эга бўлмоқда.

Янги мавсумда қайси футболчи янада қимматлашади? Суперлига мухлислари кутишда давом этмоқда! «Замин»ни Telegram’да ўқинг!