2024 йил апрелида Италия пойтахтидаги дербилардан бири — “Рома” ва “Лацио” ўртасидаги тўқнашув футбол мухлислари ёдидан чиқмаган бўлиши аниқ. Бу сафар нафақат голлар ёки драматик вазиятлар, балки икки жамоа етакчилари — Пауло Дибала ва Маттео Гендузи ўртасидаги шиддатли баҳс катта шов-шувга айланди.
Одатдаги “Рим дербиси” кучли рақобат ва қаттиқ тўқнашувларга бой бўлади. Бу гал эса, можаро янада юқори нуқтага чиқди: "Лацио" ярим ҳимоячиси Гендузи "Рома"нинг юлдуз ўйинчиси Дибалани томоғидан ушлаб, уни таҳқирлашга уринади. Айнан шу пайтда вазият кескинлашди, футболчилар орасида тортишув бошланди. Шериклари уларни ажратиб қўйди, икки футболчи ҳакамга яқинлашди.
Бошқа қизиқ жиҳати, Дибала ўша вақтда ўзининг жаҳон чемпионатидаги ғалабаси акс этган қалқон сурати билан “жавоб қайтаргани” бўлди. "Менда жаҳон кубоги бор" деган мазмундаги ишораси, аслида, нафақат Гендузига, балки бутун Францияга йўлланган кучли жавоб эди. Чунки Аргентина 2022 йилги Жаҳон чемпионати финалида Францияни мағлуб этгани ҳамон мухлислар хотирасида.
Дибала подкастда ушбу можаро ҳақида сўз юритар экан, Гендузи томонидан айтилган ҳақоратли сўзларни ҳам ошкор қилди. Француз футболчиси майдонда жамоадошларига "Мен сизларга чипта сотиб оламан ва уйингизга жўнатаман" каби сўзлар билан мурожаат қилган. Айниқса, аргентиналик ёш футболчи Сулега нисбатан “Аргентинага қайтасан” деган ҳақоратли гаплари Дибалани қаттиқ ранжитган.
"Бу мени чиндан ҳам ғазаблантирди, майдонда унга жавоб беришни хоҳлаганман. Кейин эса қалқонимни кўтариб, унга жаҳон чемпионатидаги ютуғимни ёдга солдим", — деб эслади Дибала. Ажабланарлиси, Гендузи бу ишорага ҳеч қандай жавоб бера олмаган.
Бу воқеа Рим дербисини янада ёрқин ва драматик қилди, мухлислар орасида эса Дибаланинг “символик жавоби” интернетда хитга айланди. Иттифоқо, футболда нафақат тўп, балки сўз ва ишоралар ҳам катта аҳамиятга эга эканини яна бир бор кўрсатди. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
