Шомуродовдан кейин Файзуллаев ҳам Туркияга йўл оладими?

Сўнгги кунларда ўзбекистонлик футбол ихлосмандлари учун Туркия Суперлигасидан келаётган хабарлар эътибор марказида турибди. Жумладан, “Истанбул Башакшеҳир” клуби миллий терма жамоамизнинг етакчи ҳужумчиси Элдор Шомуродовни ўз таркибига қўшиб олиш мақсадида "Рома" билан музокаралар олиб бормоқда.

Маълумотларга қараганда, клуб вакиллари Римдаги жамоа билан шартларни келишиб олиш арафасида. Агар ҳаммаси муваффақиятли якун топса, Элдор “Истанбул Башакшеҳир” билан 2028 йилгача мўлжалланган шартнома имзолайди. Бу ўзбекистонлик юлдузнинг Туркиядаги фаолияти учун янги саҳифа бўлиши кутилмоқда.

Шу билан бирга, туркиялик таниқли журналист Эртан Сузгун яна бир қизиқарли маълумотни ошкор қилди. Унинг таъкидлашича, “Истанбул Башакшеҳир” жамоаси яна бир ўзбекистонлик футболчи — ярим ҳимоячи Аббосбек Файзуллаевни трансфер қилиш бўйича муҳим босқичга етиб келган.

Аввалроқ, шу журналист “Истанбул” клуби Россиянинг ЦСКА жамоасига расман мурожаат қилганини маълум қилган эди. Энди эса музокаралар салоҳиятли якун топиши эҳтимоли ортиб бормоқда. Ҳозирча Файзуллаевга таклиф этилаётган шартнома муддати ҳақида расмий маълумот йўқ, аммо ишончли манбалар бу келишув жуда жиддий тус олганини таъкидлашмоқда.

Маълумки, Аббосбек Файзуллаев бугунги кунда Россия Премьер-лигасининг етакчи жамоаларидан бири – ЦСКА сафида муваффақиятли ўйин кўрсатмоқда. Унинг амалдаги шартномаси 2026 йилнинг ёзигача амал қилади. Германиянинг Transfermarkt портали маълумотига кўра, Файзуллаевнинг бозор қиймати 8 миллион еврога баҳоланмоқда.

Унинг техник маҳорати, универсал ўйин услуби ва майдондаги ақл билан ҳаракат қилиши нафақат ЦСКА, балки бошқа клублар мураббийларининг ҳам эътиборини тортган.

Агар ушбу трансфер амалга ошса, Аббосбек Файзуллаев учун Туркия Суперлигаси янги синов майдонига айланади. Бу лигадаги ўйин суръати ва мухлислар босими футболчига янги тажрибалар олиб келиши шубҳасиз. Шу билан бирга, у Элдор Шомуродов билан бир жамоада ҳаракат қилиш имкониятига эга бўлиши ҳам эҳтимолдан холи эмас.

Ўз навбатида, “Истанбул Башакшеҳир” клубининг ўзбекистонлик футболчиларга бўлган қизиқиши ва ишончи, юртимиз футболчиларига бўлган эътирофнинг яна бир исботи ҳисобланади.

Zamin.uz таҳририяти мазкур трансфер жараёнини диққат билан кузатишда давом этади. Яқин кунларда расмий тасдиқлар бўлиши мумкин. «Замин»ни Telegram’да ўқинг!