Рўзиқул Бердиев: Ғалаба муҳим эди, трансферлар кутилмоқда

Суперлиганинг 13-туридан ўрин олган "Машъал" — "Насаф" учрашуви меҳмонлар учун яна бир қимматли ғалаба билан якунланди. Уч очко қўлга киритганидан сўнг "Насаф" бош мураббийи Рўзиқул Бердиев матбуот анжуманида иштирок этди ва жамоа юришлари, келажак режалар ҳамда футболчилар ҳақида атрофлича фикр билдирди.

— Ғалабадан жуда мамнунмиз. Сафарда олинган уч очко ҳар доим икки ҳисса қадрли бўлади. Жамоамиз бугун яхши ҳаракат қилди. Биринчи бўлимда ташаббус бизнинг қўлимизда эди, иккинчи бўлимда эса рақибга бироз имконият бериб юбордик ва натижада гол ўтказдик. Аммо шогирдларимда ишонч ва характер бор. Қилаётган тактик ўзгаришларимиз самара беряпти, — деди мураббий.

Эшмуродовнинг алмашиниши: жароҳат ёки хато?

Мутахассиснинг сўзларига кўра, ҳимоячи Умар Эшмуродовни алмаштириш қарорининг сабаби унинг жароҳати бўлган. Унинг биринчи бўлимдан сўнг ўйинни давом эттира олмаслиги маълум бўлган ва бу мажбурий алмашишга олиб келган.

Ислом Кенжабоевнинг кетиши кутилганмиди?

Бердиев Ислом Кенжабоевнинг жамоани тарк этиши ҳақида ҳам очиқ фикр билдирди:
— У бир йил давомида жароҳат билан курашди, даволанди. Лекин соғайгандан сўнг у доимий ўйин амалиётини истади. Биз эса уни аста-секинлик билан жисмоний ҳолатга қайтаришни режалаштирган эдик. Шу боис ўзаро келишув асосида уни жамоадан озод қилдик ва омад тиладик, — деди Бердиев.

Янги трансферлар: жамоа кучаядими?

“Насаф”да янги футболчилар билан шартнома имзолаш бўйича ишлар олиб борилмоқда. Бердиевнинг айтишича, айни пайтда 2-3 футболчини жамоага қўшиш режаси бор. Уларнинг орасида маҳаллийлар ҳам, легионерлар ҳам бор.
— Ҳозирча номини айтмаймиз, аммо аниқ мақсадимиз — жамоа ўйинини кучайтириш, — деди бош мураббий.

Азиз Ғаниев қайтадими?

ОАВда тарқалган Азиз Ғаниевнинг "Насаф"га қайтиши ҳақидаги хабарларга ҳам Бердиев аниқ нуқта қўйди:
— Азиз ҳақида ҳеч қандай музокара бўлмаган. Унинг амалдаги клуби билан тўлиқ шартномаси бор. Менимча, у "Насаф"га қайтадиган вазиятда эмас, — дея билдириб ўтди мутахассис.

"Насаф"да ғалабалар билан бирга жиддий ислоҳотлар бошланмоқда. Таркибий ўзгаришлар, эҳтимолий трансферлар ва жамоанинг мунтазам ривожи — барчаси кўзда тутилган. Бердиев эса жамоа руҳиятини юқори тутиб, асосий мақсад — чемпионлик сари қадам ташламоқда. «Замин»ни Telegram’да ўқинг!