Ўзбек шифокори Мбаппе шифохонага тушишига аниқ изоҳ берди

Франция терма жамоаси ва «Реал Мадрид» ҳужумчиси Килиан Мбаппенинг шифохонага ётқизилгани футбол жамоатчилиги орасида турли тахминларга сабаб бўлди. Расмий баёнотларда унда “гастроэнтерит” аниқлангани айтилди. Аммо Ўзбекистондаги машҳур футбол шифокорларидан бири — "Локомотив" клуби мутахассиси Аброр Пирриев бу ҳолатга нисбатан кескин ва изчил фикр билдирди.

Мутахассис ўзининг телеграм-каналида Мбаппенинг вазиятини қуйидагича изоҳлади:

"Мбаппени шошилинч ҳолатда касалхонага ётқизишди. Аммо эртаси кунёқ жавоб беришди. Бу ҳолатдан барча нарса равшан кўриниб турибди. Футболчи, катта эҳтимол билан, ўйиндан кейин (хурсандчилик ёки алам сабабли) байрам қилган. Овқатланишда эҳтиёт бўлмаган ва натижада заҳарланиш юз берган. Расмий ташхис эса “гастроэнтерит” деб қўйилди — шунчаки чиройли атама, холос."

Пирриевнинг сўзларига кўра, агар воқеа ҳақиқатан гастроэнтерит бўлса, нега фақат Мбаппега таъсир қилган? Бу каби ҳолатларда жамоавий ҳолат кузатилади. Шу боис у Мбаппега нисбатан “эркатой” ва “инжиқ характерга эга” деб таъриф берди.

"Бу албатта менинг шифокорона фикрим", — деб ёзади у.

Аброр Пирриев бу орқали нафақат тиббий нуқтаи назардан, балки спорт психологияси жиҳатидан ҳам футболчиларнинг профессионал этика ва интизомга риоя қилиши муҳимлигини уқдирмоқчи.

Эслатиб ўтамиз, Килиан Мбаппе яқиндаги ўйинда жароҳат ҳам олгани, энди эса тўсатдан касал бўлиб қолгани сабаб мухлислар орасида унинг ҳолатига нисбатан турлича фикрлар пайдо бўлди. Аммо футболчининг тезда сафга қайтиши кутилмоқда. «Замин»ни Telegram’да ўқинг!