Лионель Месси келажаги борасида бир қарорга келди

Футбол дунёси яна бир карра аргентиналик супер юлдуз Лионель Мессининг қарорини қизиқиш билан кузатмоқда. Охирги кунларда у ҳақда турли миш-мишлар тарқалди – хусусан, Саудия Арабистони клубларидан рекорд даражадаги таклифлар тушаётгани ҳақида хабарлар кўпайган эди. Бироқ инсайдер Николо Скира маълумотига кўра, Месси келажагини айнан “Интер Майами” билан боғлашни маъқул кўрмоқда.

37 ёшли маэстро жамоада қолиш ва янги шартнома имзолашга яқин турибди. Айни пайтда икки томон ўртасида музокаралар қизғин давом этмоқда – янги битим шартларига кўра, Месси 2026 йил декабрига қадар клуб шарафини ҳимоя қилиши кутилмоқда.

Эслатиб ўтамиз, Лионель Месси 2023 йилнинг ёзидан буён “Интер Майами” сафида тўп суриб келмоқда. У жамоага қўшилганидан бери, клубнинг ҳам, АҚШ футболи муҳитининг ҳам қиёфаси сезиларли ўзгарди. Мавсум давомида у барча мусобақаларда 22 марта майдонга тушди, 16та гол ва 6та голли узатма билан яна бир бор ўзининг чемпионлик характерини кўрсатди.

Аниқланишича, Саудия Арабистонидан бўлаётган молиявий жозибали таклифларга қарамай, Лионель Месси ўзини Майамидан топди – у бу ерда нафақат янги муҳит, балки жамоанинг асосий етакчиси сифатида ҳам ўзига хос кайфиятга эга бўлди. Месси МЛС тарихида энг машҳур ва таъсирли футболчи сифатида номи қолмоқда.

Месси ва “Интер Майами” ҳамкорлигининг яна икки йилга узайиши клубга ҳам катта умид ва янги мақсадлар бағишлайди. Жамоа Мессининг тажрибаси, лидерлиги ва голларига таяниб, янги юқори марралар сари интилади.

Ушбу қарор нафақат Майами мухлислари, балки бутун АҚШ футболига ижобий таъсир кўрсатиши аниқ. Мессининг МЛСда қолиши лига нуфузини янада ошириши, янги ёш футболчилар учун катта мактаб бўлиб хизмат қилиши шубҳасиз. «Замин»ни Telegram’да ўқинг!