Европа футболида эътибор марказида юрадиган юлдузлар орасида Илкай Гюндоган ҳам бор. 34 ёшли Германия терма жамоаси ва "Манчестер Сити"нинг собиқ сардори фаолиятида янги босқичга тайёрланмоқда — у Туркиянинг етакчи клуби "Галатасарой" билан шахсий шартнома шартларини келишиб олди.
"Фанатик" нашри тарқатган хабарга кўра, Гюндоган ва "Галатасарой" ўртасида икки йиллик шартнома бўйича келишувга эришилган. Шартномада яна бир мавсумга узайтириш имконияти ҳам назарда тутилган. Ҳозирда турк клуби ва "Манчестер Сити" ўртасида расмий музокаралар олиб борилмоқда.
Тажрибали ярим ҳимоячи 2016 йилдан 2023 йилгача "Сити" таркибида асосий фигуралардан бири бўлиб келди. Кейин у "Барселона"га ўтиб, бир мавсумни Испанияда ўтказди. Аммо 2023/2024 мавсумида яна манчестерликлар сафига қайтди ва 50 та ўйинда майдонга тушди. Ушбу ўйинларда 3 та гол ва 7 та ассист муаллифига айланди.
Гюндоганнинг амалдаги шартномаси 2026 йилнинг ёзигача амал қилади. Бироқ, футболчи янги чақириқларга тайёр эканини билдирган. Унинг трансфер баҳоси ҳозирда 5 миллион евро атрофида баҳоланмоқда.
Маълумки, "Галатасарой" ҳар мавсумда катта мақсадлар билан майдонга тушади. Истеъдодли ёшлар ва тажрибали юлдузларни уйғунлаштирган бу клуб сўнгги йилларда турк футболида устунликни сақлаб турибди.
Гюндоганнинг турк суперлигасига келиши нафақат унинг футбол ҳаётида янги саҳифа бўлади, балки бутун туркиялик мухлислар учун ҳам тарихий воқеага айланиши мумкин. Агар музокаралар муваффақиятли якунланса, "Галатасарой" тарихидаги энг таниқли трансферлардан бири амалга ошган бўлади.
Шу тариқа, Илкай Гюндоган фаолиятида янги синавларга тайёрланаётган кўринади. Турк клуби эса катта тажриба ва профессионализмга эга ўйинчи орқали ўз амбицияларини янада кучайтиришни истаяпти. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
