Инфантино: Яқин йилларда футбол Америкада спорт етакчисига айланади

Яқин йилларда АҚШда футбол том маънода инқилобий ўзгаришлар арафасида. ФИФА президенти Жанни Инфантинонинг таъкидлашича, энди футбол бутун Америка қитъасида энг оммабоп ва талаб юқори бўлган спорт турига айланиши мумкин. Унинг фикрича, айнан АҚШда футболни ривожлантириш ФИФАнинг устувор йўналишларидан бири бўлиб қолмоқда.

"Уч-тўрт, кўпи билан беш йилдан сўнг футбол Америкада спортнинг мутлақ етакчисига айланади. Бу ердаги лига дунёдаги энг кучли ва рақобатбардош чемпионатлардан бирига айланиши аниқ. Мен буни ўз кўзим билан кўраман, бу ҳақиқатга айланади", — деди Инфантино ўз интервьюсида.

Инфантино, шунингдек, АҚШда футболни янада оммалаштириш ва рақобатни ошириш учун жамоалар даражасини кўтариш ва тушириш тизимини (промоушн-релегейшн) жорий этишни таклиф қилди. Бу система Европа чемпионатларида ўз самарасини кўрсатган ва Америка футболи учун ҳам тўлиқ мос келиши мумкин.

Айтиш керакки, бугунги кунда клублар ўртасидаги Жаҳон чемпионати АҚШда юқори қизиқиш уйғотмоқда, аммо баъзи ўйинлар учун чипталар нархи шунчалик арзонки, стадионларни тўлдиришнинг ўзи алоҳида муаммога айланяпти. Масалан, Мисрнинг “Ал-Аҳли” ва Лионель Мессининг “Интер Майами” жамоалари ўртасидаги Клублар ўртасидаги Жаҳон чемпионати биринчи ўйинига чипталар атиги 4 долларга сотилди. Бу ҳолат томошабинларнинг қизиқиш даражаси ва маркетинг сиёсати ҳақида ўйлаб кўришга мажбур қилади.

ФИФАнинг янги сиёсати, нуфузли жаҳон чемпионатлари, юлдуз футболчиларнинг келиши ҳамда миллий чемпионатларнинг модернизация қилиниши Америкада футболнинг катта портлашга сабаб бўлиши мумкин. Келгуси йилларда мамлакатда футбол бўйича янги тарих ёзилиши, миллионлаб янги мухлислар пайдо бўлиши ва АҚШнинг футбол бозори глобал рақобатда етакчи ўринни эгаллашини тахмин қилиш мумкин.

Жанни Инфантинонинг ишончли прогнозлари ва АҚШда футболнинг катта мақсадлар сари интилиши футбол дунёсида янги давр бошланганидан дарак беради. Демак, Америкада футболнинг ёрқин келажаги энди бошланмоқда! «Замин»ни Telegram’да ўқинг!