2026 йилги аёллар Осиё кубоги саралаш босқичи арафасида жамоалар бош мураббийлари иштирокида ўтган матбуот анжумани футбол муҳитини янада қизитди. Ўзбекистон аёллар миллий терма жамоаси устози Котрина Кулбите ўз жамоаси ҳолати ва саралашдаги режалари ҳақида очиқ-ойдин фикр билдирди.
Мураббийнинг сўзларига кўра, терма жамоада сўнгги 6 ой ичида жуда ижобий муҳит ва юқори кайфият шаклланган. Футболчиларнинг руҳий ва жисмоний ҳолати юқори, ички муҳит эса таркибда бирдамлик ва ишончни таъминлаган. “Тайёргарлик жараёнида ҳар бир ўйинчи ўз устун томонларини намоён қила бошлади. Жамоамиздаги илк кунларданоқ мусбат кайфият ва ўзаро ҳурматга асосланган муҳит яратишга ҳаракат қилдим. Бу мақсадга эришганимдан мамнунман”, — дейди Кулбите.
Осиё кубоги саралаш босқичида “F” гуруҳида иштирок этувчи рақиблар — Непал, Шри-Ланка ва Лаос жамоалари ҳақида ҳам тўхталди. Мураббий таъкидлашича, ҳар бир рақибнинг ўйини чуқур ўрганилган ва уларнинг кучли жиҳатлари таҳлил қилинган. Айниқса, Непал термасига бир ой аввал янги мураббий тайинлангани ва таркибда бир қатор легионерлар борлиги қайд этилди.
“Шри-Ланка ҳамда Лаос жамоаларига қарши беллашувлар ҳам енгил ўтмайди. Ҳар бир ўйинда максимал натижа қайд этишга ҳаракат қиламиз. Барча қарорлар майдонда, ўйин пайтида қабул қилинади. Биз эса ўз услубимиздан воз кечмаймиз ва юқори кайфиятда ҳаракат қиламиз”, — деди бош мураббий.
Кулбите сўзларида жамоанинг Осиё кубоги йўлланмасини қўлга киритиш учун барча имкониятлари борлигини алоҳида таъкидлади. Айтиш мумкинки, терма жамоа аёллар футболининг янги босқичига қадам қўяётганини кўрсатмоқда.
Саралашнинг қизғин палласида эса барча эътибор — майдондаги асосий тўқнашувлар ва қизиқарли баҳсларга қаратилган. Мухлислар эса Ўзбекистон аёллар термасига ишонч ва умид билан назар ташламоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
