Европа трансфер бозорида бу йил ҳам интригалар авжида — Франция терма жамоаси ва “Интер”нинг ҳужумчиси Маркус Тюрамнинг номи яна шов-шувларга сабаб бўлмоқда. Итальян нашри Il Giorno маълумотига кўра, Тюрамнинг имкониятларидан Англия гранди “Арсенал” ҳамда “Манчестер Юнайтед” фаол равишда қизиқмоқда. Икки клуб ҳам янги марказий ҳужумчи излаш жараёнида ушбу номга алоҳида эътибор қаратмоқда.
Шу билан бирга, илгарироқ Маркус Тюрам билан қизиқиш билдирган ПСЖ клуби ҳам ёзги трансфер ойнасида уни ўз сафида кўриш ниятида экани айтилмоқда. Футболчининг “Интер” билан амалдаги шартномасида 85 миллион еврога тенг тўлов шарти бор ва бу сумма катта эҳтимол билан клубларнинг музокаралар жараёнида асосий масалага айланади.
Миланликлар эса ўз навбатида Маркус Тюрамнинг эҳтимолий кетишига тайёргарлик кўрмоқда. Журналистлар маълумотларига кўра, “Интер” жамоаси “Фиорентина”нинг снайпери Мойзе Кинни эҳтимолий ворис сифатида кўриб чиқмоқда. Қизиқарлиси, Кин учун белгиланган 52 миллион евролик воз кечиш пули 15 июлгача амал қилади. Агар ушбу санага қадар келишув амалга ошмаса, “Фиорентина”ни 25 та гол урган ҳужумчини сотишга кўндириш анча мушкул бўлади.
Шунингдек, инсайдерлар маълумотига кўра, “Арсенал” ва “Манчестер Юнайтед” Мойзе Кин билан ҳам алоқада экани қайд этилган — бу эса трансфер музокараларини янада қизғинлаштиради.
Эслатиб ўтамиз, Маркус Тюрам ўтган мавсум А Серияда 32 ўйинда иштирок этиб, 14 та гол ва 4 та ассист билан жамоага катта ҳисса қўшган. Уни катта клублар ўзига оғдириши ёки “Интер” сафида қолишини вақт кўрсатади.
Мухлислар эса трансфер бозоридаги бу драманинг якунларини интиқлик билан кутмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
