Дунёнинг энг кучли тўртлиги аниқланди: қайси клуб чемпионлик сари энг яқин номзод?

ФИФА томонидан янгиланган форматда ва АҚШнинг замонавий стадионларида ўтаётган клублар ўртасидаги жаҳон чемпионати ўз финал босқичига етиб келди. Мусобақанинг бу босқичида шиддат, драматизм ва интрига бирлашган — энг кучли тўрт жамоа ярим финалга йўл олди.

Opta аналитика маркази томонидан ишлаб чиқилган суперкомпьютер замонавий алгоритмлар ёрдамида ярим финалда иштирок этувчи клубларнинг чемпионлик эҳтимолини ҳисоблаб чиқди. Бу натижалар футбол ишқибозлари ва мутахассислари учун қизиқиш уйғотмоқда.

Чемпионлар лигасининг амалдаги ғолиби, Франция гранди “Пари Сен-Жермен” турнирда бошқалардан юқори баҳоланди. Superkompyuter ҳисоб-китобига кўра, ПСЖнинг жаҳон чемпионатида ғолиб чиқиш эҳтимоли 38,54 фоизни ташкил этмоқда. Бу кўрсаткич Париж клубини бош фаворитга айлантирди.

Англиянинг машҳур клуби “Челси” ҳам кучли номзодлардан бири бўлиб, уларнинг чемпионлик имконияти 33,86 фоизга баҳоланди. Бу натижа “аристократлар”ни иккинчи ўринга қўймоқда.

Турнирнинг тарихий грандларидан бири “Реал Мадрид” ярим финалда чемпионлик учун 24,67 фоиз эҳтимолга эга экани маълум қилинди. Испания жамоаси яна бир бор ўз бренди ва ўзига хос ўйин услуби билан юқори поғонага чиқишга интилади.

Ярим финалнинг “сирли меҳмони” сифатида Бразилиянинг “Флуминенсе” жамоаси қатнашмоқда. Экспертлар ва компютер моделлари ушбу жамоанинг чемпионлик эҳтимолини 2,93 фоиз этиб баҳолаган. Бу кўрсаткич — улардан мўъжиза кутилаётганини билдирмайди.

Ярим финалда “Флуминенсе” Англиянинг “Челси” клубига қарши майдонга чиқади. “Пари Сен-Жермен” ва “Реал” ўртасидаги тўқнашув эса мусобақанинг финалдан олдинги финали сифатида кўрилади.

Ярим финал учрашувлари 8 ва 9 июль кунлари, асосий финал эса 13 июль куни бўлиб ўтади. Ушбу янгиланган форматдаги мундиал нафақат футбол мухлисларини, балки бутун жаҳон жамоатчилигини ўзига жалб этди. Ҳар бир иштирокчи жамоа ўз ғалабаси учун сўнгги дақиқагача курашади.

Мусобақанинг бу босқичида кутилмаган натижалар, ёрқин ўйинлар ва кучли ҳис-туйғулар албатта ўз ўрнини топади. Финалга қайси жамоалар етиб боради ва тарихдаги янги чемпион номи ким бўлади — бу саволга жавоб учун эса бор-йўғи бир неча кун қолди. «Замин»ни Telegram’да ўқинг!