Осимхен учун кураш қизимоқда: “Галатасарой” рекорд трансферга тайёр

Истанбулнинг машҳур “Галатасарой” клуби нигериялик тўпурар Виктор Осимхенни ўз таркибида сақлаб қолиш учун барча чораларни кўрмоқда. Клуб мутасаддилари ҳужумчининг трансфери учун 75 миллион евро тўлашга тайёр эканини маълум қилган — бу эса унинг “Наполи” билан тузган шартномасидаги расмий товон пули ҳисобланади.

Эслатиб ўтамиз, Виктор Осимхен ўтган мавсумни “Галатасарой” сафида ижара асосида ўтказган ва мухлисларни ҳайратга солган статистикага эришган — 41 ўйинда 37 та гол! Унинг тезкорлиги, голли вазиятда тўғри қарор қабул қилиш қобилияти ва юқори жисмоний тайёргарлиги жамоанинг чемпионлик юришларида муҳим омил бўлди.

“Галатасарой” раҳбарияти ҳозирда “Наполи” билан музокараларни бошлаган бўлиб, трансфернинг расмийлашиши учун барча иқтисодий ва юридик жиҳатлар кўриб чиқилмоқда. Клуб мухлислари эса Осимхенни жамоа тарихидаги энг қиммат трансфер сифатида кўришга умид қилмоқда.

Экспертлар фикрича, агар бу келишув амалга ошса, “Галатасарой” нафақат кучли ҳужумчини ўз таркибида сақлаб қолади, балки Европа футболидаги амбициясини яна бир бор исботлайди.

Сиз нима деб ўйлайсиз, Осимхен Туркияда қоладими ёки унинг йўли яна катта лигани кўрсатадими? «Замин»ни Telegram’да ўқинг!