"Челси" финалда зафар қучди, Палмер эса тарихга кирди

Тунги қоронғулик финал драмаси билан ёришди: янги форматдаги клублар ўртасидаги Жаҳон чемпионати ўз ниҳоясига етди. Узоқ кутилган ҳал қилувчи тўқнашувда Лондоннинг шарафини ҳимоя қилган “Челси” клуби Парижнинг машҳур ПСЖ жамоасини майдонда тўлиқ мағлуб этиб, титулни қўлга киритди. “Кўклар”нинг ғалабаси жуда ишонарли ва таъсирли чиқди — 3:0!

Бу натижа нафақат чемпионликни белгилади, балки бир неча индивидуал соврин эгаларини ҳам аниқлаб берди. Мусобақа давомида ўз ўйини билан томошабинларни мафтун этган ярим ҳимоячи — Коул Палмер турнирнинг расман энг яхши футболчиси деб топилди, деб хабар берди championat.com.

23 ёшли англиялик футболчи ушбу чемпионатда “Челси” учун ажойиб натижалар қайд этди. Унинг ҳисобида 6 та учрашув, 3 та гол ва 3 та ассист бор. У нафақат финалда дубл қайд этди, балки жамоанинг ўйин стилини тубдан ўзгартирди. Унинг паслари, дриблинглари ва қарор қабул қилиш тезлиги мутахассислар томонидан алоҳида қайд этилди.

ФИФА мукофоти Палмер учун фақат соврин эмас, балки у “Челси”да етакчи футболчига айланаётганини ҳам тасдиқлайди. Баъзилар буни унинг терма жамоа учун ҳам янги саҳифа очиши деб баҳоламоқда.

Мусобақанинг энг яхши ёш футболчиси номига эса ПСЖ жамоасининг ёш истеъдоди — Дезире Дуэ лойиқ деб топилди. Унинг майдондаги ҳаракатчанлиги, техник маҳорати ва тўп билан ишлаши мухлислар қалбини забт этди. Франциялик ёш юлдуз келажакдаги янги Мбаппе бўлиши мумкин, деган фикрлар ҳам янграмоқда.

Дарвозабонлар орасида энг ишончли ва барқарор ўйин кўрсатган футболчи сифатида “Челси”нинг асосий кипери — Роберт Санчес тан олинди. Унинг реакцияси, ҳаводаги ҳаракатлари ва 1-га-1 вазиятлардаги муваффақиятлари жамоанинг финалгача бўлган муваффақиятида муҳим рол ўйнади.

Шу тариқа, мусобақа якунланди ва ундан бир неча тарихий номлар, истеъдодлар ва ёдда қоларли лаҳзалар қолди. “Челси”нинг янги тарихи бошланди, Палмер эса бу тарихнинг марказида туради. Унинг муваффақияти ёшларга умид, жамоасига эса ғурур бахш этди. «Замин»ни Telegram’да ўқинг!